کراچی میں مون سون بارشوں کا سلسلہ جاری، سڑکوں پر پانی جمع

 کراچی: شہر قائد کے مخلتف علاقوں میں مون سون بارشوں کا سلسلہ جاری ہے، خلیج بنگال سے آنے والے مون سون کے پانچویں شدید اسپیل بدھ کو غیرمعولی بارشوں کا سبب بن گیا جس کے باعث متعدد سڑکوں پر پانی جمع ہوگیا۔

ایکسپریس نیوز کے مطابق چیف میٹرولوجسٹ سردار سرفراز کا کہنا ہے کہ خلیج بنگال سے آنے والے پانچویں مون سون سسٹم کی شدت برقرار ہے، سسٹم کا کچھ حصہ راجستھان اور اس کا مرکز مشرقی سندھ پر موجود ہے جس کے باعث کراچی سمیت سندھ بھر میں گرج چمک کے ساتھ بارش کا امکان ہے۔ سسٹم کا پھیلاؤ وسطی سندھ اور بلوچستان تک پھیلا ہوا ہے۔

محکمہ موسمیات کی جانب سے جاری اعداوشمار کے مطابق سب سے زیادہ بارش گلشن حدید میں 101 ملی میٹر ریکارڈ ہوئی، قائد آباد37،گڈاپ ٹاون 29.2،صدر 29،سعدی ٹاون 25.8،یونیورسٹی روڈ 21.2،جناح ٹرمینل 18.4ملی میٹر بارش ہوئی۔

محکمہ موسمیات ارلی وارننگ سینٹر کی پیش گوئی کے مطابق مون سون ہواوں کا کم دباو مشرقی سندھ اور ملحقہ مغربی راجستھان بھارت پر موجود ہے، کراچی میں وسیع پیمانے پر گرج چمک کے ساتھ درمیانی بارش کا امکان ہے،کچھ مقامات پر اس دوران موسلادھار بارشیں بھی متوقع ہیں۔

بلوچستان میں 18 سے 20 اگست کے دوران شدید بارشوں کے سبب دادو،قمبرشہدادکوٹ،جامشورو میں تیز سیلابی ریلے کے خدشات ہیں، آج(جمعرات) کو موسلادھار بارشوں کی وجہ سے کراچی، حیدرآباد، بدین، ٹھٹھہ، میرپورخاص سمیت دیگر اضلاع کے نشیبی علاقوں میں پانی جمع ہوسکتا ہے۔

دوسری جانب ٹریفک پولیس نے شہریوں کو ہدایت کی ہے کہ بارش کے دوران ڈرائیونگ میں احتیاط کریں اور غیر ضروری سفر سے گریز کریں۔

شہر قائد میں گذشتہ کئی گھنٹوں سے تیز بارش کا سلسلہ جاری ہے مزید بارش کی پیشنگوئی ہےاور شہر بھر میں بارشوں کا سلسلہ وقفے وقفے سے جاری رہے گا تمام ڈرائیور اور گاڑیاں استعمال کرنے والے حضرات سے گزارش ہے کہ دوران ڈرائیونگ احتیاط کریں اور غیر ضروری سفر سے گریز کریں۔
#WeatherAlert pic.twitter.com/6C8PpSqdOF

— Karachi Traffic Police (@Khitrafficpol) August 18, 2022