وزیراعظم کا پنجرہ پل 8 گھنٹے میں بحال کرنے پر عملے کیلیے 50 لاکھ روپے انعام کا اعلان

ویب ڈیسک  اتوار 4 ستمبر 2022
وزیراعظم کا بلوچستان کے سیلاب زدہ علاقوں کا دورہ، شاہراہوں، پلوں اور ریلوے انفرا اسٹرکچر کا جائزہ (فوٹو : اسکرین گریب)

وزیراعظم کا بلوچستان کے سیلاب زدہ علاقوں کا دورہ، شاہراہوں، پلوں اور ریلوے انفرا اسٹرکچر کا جائزہ (فوٹو : اسکرین گریب)

 کوئٹہ: وزیراعظم شہباز شریف کا بی بی نانی پنجرہ پل کو محض 8 گھنٹے میں بحال کرنے والے انجینئرز اور ورکرز کے لیے پچاس لاکھ روپے انعام کا اعلان کردیا۔

ایکسپریس نیوز کے مطابق وزیراعظم شہباز شریف نے بلوچستان کے سیلاب سے متاثرہ علاقوں کا دورہ کیا۔ ان کے ساتھ وزیراعلیٰ بلوچستان عبدالقدوس بزنجو، وزیر مواصلات، چیئرمین این ایچ اے بھی موجود تھے۔

اپنے دورے میں وہ بلوچستان میں تباہ ہونے والے بی بی نانی پنجرہ پل پہنچے جہاں انہیں سیلاب سے نقصانات اور بحالی پر بریفنگ دی گئی۔

وزیراعظم کو ضلع کچھی میں پنجرہ پل پر سیلاب سے متاثرہ سڑکوں، ریلوے انفرا اسٹرکچر کی بحالی پر بھی بریفنگ دی گئی۔ شہباز شریف نے کام کرنے والے انجینئرز اور مزدوروں کو شاباش دی ۔

وزیراعظم نے کہا کہ شاہراہیں بحال کرنے کی کوشش کی جا رہی ہے، سب لوگوں نے محنت کی، ان سب کو سلام پیش کرتا ہوں، چند روز بعد پھر بلوچستان کا دورہ کروں گا۔

بی بی نانی پنجرہ پل کو آٹھ گھنٹوں میں درست کرنے پر انہوں نے پل کو بحال کرنے والے تمام ورکروں کےلیے 50 لاکھ روپے انعام کا اعلان کیا جس میں 30 لاکھ روپے وفاقی حکومت اور 20 لاکھ روپے بلوچستان حکومت کی جانب سے دیے جائیں گے۔

انہوں نے کہا کہ ساری انتظامیہ نے جواں ہمت کے ساتھ مل جل کر کام کیا اور  بی بی نانی پل کو دوبارہ ٹریفک کے لیے کھول دیا جس پر یہ سب شاباش کے مستحق ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔