مقبوضہ مغربی کنارے میں اسرائیلی بس پر فائرنگ سے 5 افراد زخمی

مقبوضہ مغربی کنارے میں اسرائیلی بس پر فائرنگ کے حملے میں 5 افراد زخمی ہو گئے۔

میگن ڈیوڈ ایڈوم ایمرجنسی میڈیکل سروسز کے پیرامیڈک میٹی کارمی نے کہا کہ ہم نے بس کے باہر گولیوں کا نشانہ بننے والے 2 افراد کو دیکھا جن کا علاج اسرائیلی فوج کے طبی عملے اور وقوعہ پر موجود دیگر افراد کر رہے تھے۔

انہوں نے بتایا کہ شمالی مغربی کنارے میں فائرنگ سے زخمی ہونے والے دونوں افراد ہوش میں تھے اور انہیں ہیلی کاپٹر کے ذریعے اسرائیلی شہر حیفہ کے رمبم اسپتال لے جایا گیا۔

ایم ڈی اے نے بتایا کہ 3 دیگر افراد شیشے کے ٹکڑوں سے زخمی ہوگئے اور بعد میں انہیں سڑک کے ذریعے شمالی اسرائیل کے ایک اور ہسپتال میں منتقل کر دیا گیا۔

بس ڈرائیوروں کی نمائندگی کرنے والی یونین کی طرف سے شائع کردہ تصویر میں گاڑی کی ونڈ اسکرین کو گولیوں کے سوراخوں سے بھرا ہوا دکھایا گیا ہے۔ اسرائیلی وزیر دفاع بینی گانٹز نے کہا کہ سیکیورٹی فورسز نے فوری طور پر حملے میں ملوث مشتبہ افراد کو پکڑ لیا۔