شہر قائد میں کئی مقامات پر قوس قزح کے رنگ بکھر گئے

 کراچی: شہر قائد میں پیر کو بارش کے بعد کئی مقامات پر قوس قزح دکھائی دی۔

ایکسپریس کے مطابق شہر قائد میں پیر کو بارش کے بعد نیشنل اسٹیڈیم کے قرب و جوار جبکہ ڈی ایچ اے اور کراچی ائرپورٹ سمیت مختلف علاقوں میں قوس و قزح کے دلکش رنگ آسمان پر بکھرے دکھائی دیے۔

ماہرین کے مطابق قوس قزح یا دھنک میں سبز، پیلا، گہرا نیلا، جامنی، نیلا، سرخ سمیت سات رنگوں کی کمان بن جاتی ہے، دھنک اس وقت بنتی ہے جب سورج کی روشنی کی شعاع پانی کے ایک قطرے میں داخل ہوتی ہے یہ قطرہ مثلثی انداز میں کام کرتا ہے۔

پانی کے قطرے میں داخل ہونے کے بعد یہ شعاع مڑتی ہے، قطرے کے آخر میں پہنچ کر یہ شعاع منعکس ہوتی ہے اور واپس مڑتی ہے قطرے سے باہر نکل کر دوبارہ مڑتی ہے اور سات رنگوں ميں تبدیل ہو جاتی ہے۔