عمان ایئرپورٹ پر مسافر بردار بھارتی طیارے کو خوفناک حادثہ

مسقط: عمان کے دارالحکومت کے ہوائی اڈے پر بھارتی ایئرلائن کمپنی ایئر انڈیا ایکسپریس کے انجن میں اچانک آگ لگ گئی جس کے بعد مسافروں کو ہنگامی طور پر طیارے سے باہر نکالنا پڑا۔

بھارتی میڈیا کے مطابق عمان کے دارالحکومت مسقط سے بھارتی شہر کوچی روانگی کے لیے تیار انڈین ایئرلائن کمپنی کے مسافر بردار طیارے میں اچانک آگ بھڑک اُٹھی۔ رن وے پر ہر طرف دھواں پھیل گیا اور ایوی ایشن کے حکام کی دوڑیں لگ گئیں۔

ایئرپورٹ حکام نے فوری طور پر مسافروں کو طیارے سے باہر نکال کر محفوظ مقام پر منتقل کیا اور اس دوران فائر بریگیڈ کا عملہ بھی طلب کرلیا۔ آگ انجن میں لگی تھی جس پر جلد ہی قابو پالیا گیا۔

#NDTVBeeps | Watch: Air India Express Plane Catches Fire At Muscat Airport, Passengers Safe pic.twitter.com/DcHZZzOAOC

— NDTV (@ndtv) September 14, 2022

طیارے میں 141 افراد موجود تھے۔ خوش قسمتی سے حادثے میں کوئی جانی نقصان نہیں ہوا تاہم کچھ مسافروں کو معمولی زخم آئے ہیں جنھیں ایئرپورٹ پر ہی طبی امداد دیدی گئی۔ مسافروں کو دوسرے طیارے میں روانہ کردیا گیا۔

انجن میں آگ لگنے کی وجہ کا تعین نہیں ہوسکا ہے۔ ایوی ایشن اور ایئرلائن کمپنی نے واقعے کی تحقیقات کے لیے انکوائری کمیٹی تشکیل دیدی۔