افواہوں کی وجہ سے ڈالر کی قیمت بڑھ رہی ہے، وزیر تجارت

ٹنڈو محمد خان: وزیر برائے تجارت سید نوید قمر نے کہا ہے کہ افواہوں کی وجہ سے ڈالر پر سٹا کھیلا جارہا ہے اور اسی وجہ سے امریکی کرنسی کی قدر بڑھ رہی ہے۔

ٹنڈو محمد خان میں میڈیا سے گفتگو کرتے ہوئے سید نوید قمر نے کہا کہ بد قسمتی سے افواہوں کی بنیاد پر ڈالر روک کر سٹا کھیلا جاتا ہے، حکومت ڈالر کی قیمت کو کنٹرول کرنے کی کوشش کر رہی ہے۔

انہوں نے کہا کہ امپورٹ اور ایکسپورٹ میں توازن ضروری ہے تاہم زیادہ خرچہ فیول کی ادائیگیوں میں آتا ہے جسے کم کرنا ہے۔

اُن کا کہنا تھا کہ عمران خان کی خواہش پر عام انتخابات نہیں ہوسکتے، پی ٹی آئی چیئرمین جیسے لوگوں کو کبھی اقتدار میں نہیں آنا چاہیے جو اپنے پاور کیلئے ملک کا بیڑا غرق کرنے پر تلے ہوں۔