سرکاری افسر کے گھرمیں کروڑوں کی رقم اورزیورکی ڈکیتی

 کراچی:  شاہ لطیف ٹاؤن کے علاقے میں اسسٹنٹ فوڈ کنٹرولر کے گھر سے ڈاکوؤں نے نقدی اورپرائز بانڈز سمیت ایک کروڑ 70 لاکھ کے طلائی زیورات اور قیمتی سامان لوٹ لیا

تفصیلات کے مطابق شاہ لطیف ٹاؤن کے علاقے سندھی جماعت کوآپریٹو ہاوسنگ سوسائٹی کے رہائشی اسسٹنٹ فوڈ کنٹرولر سکندر علی کے گھرپر2 ڈاکوؤں نے دھاوا بول کر انھیں اور پوری خاندان کو ایک کمرے میں بند کرکے الماری میں رکھی ہوئی نقدی ، طلائی زیورات ، انعامی بانڈز اور دیگر سامان لوٹ لیا ،سکندر علی نے ایکسپریس نیوز کو بتایا کہ ڈاکو گھر سے تقریبا ایک کروڑ 70 لاکھ روپے کا سامان لوٹ کر لے گئے۔

رات بارہ بجے کے درمیان اپنی گاڑی کو گھر کے اندر لانے کے لیے دروازہ کھولا اس دوران 2 ڈاکوؤں نے مجھے یرغمال بنالیا اور میرے ماتھے پرپسٹل رکھ دی میں نے مزاحمت کرنے کی کوشش کی تو انھوں نے کہا ہم تھمیں جاں سے مار دیں گے وہ مجھے یرغمال بناکر گھر کے اندر لے جاکر فیملی سمیت ایک کمرے میں بند کردیا۔

اس کے بعد ڈاکوؤں نے الماری کا تالا توڑ کر سارا سامان لوٹ لیا، سکندر علی نے مزید بتایا کہ ڈاکوشلوار قمیص پہنے ہوئے تھے ایک اندازے کے مطابق ان کی عمریں 40 سے 45 سال کے درمیان معلوم ہوتی ہے شاہ لطیف ٹاؤن پولیس نے واقعے کا مقدمہ سکندر علی کی مدعیت میں 2 نامعلوم ملزمان کے خلاف درج کرلیا۔

ایس ایچ او شاہ لطیف ٹاون چوہدری اسلم کے مطابق سوسائٹی کے اندر اور باہر کی سی سی ٹی وی فوٹیج سے جائزہ لے رہے ہیں کہ ملزمان سوسائٹی میں کس راستے سے داخل ہوئے اور ان کی تعداد کتنی تھی ایس ایچ او نے مزید بتایا لوکیشن کی مدد سے معلوم ہوا کہ گھر سے غائب ہونے والے 3 اسمارٹ فون گھر میں ہی موجود ہے اور انھیں گھر سے برآمد کرلیے گئے اور ان کے نمبرز کو بھی چیک کیا جارہا ہے واقعے کی ہر زاویے سے تفتیش کررہے ہیں ۔

ایس ایچ او کا کہنا ہے یہ بھی معلومات حاصل کی جارہی ہے کہ سکندر علی نے اتنی بڑی رقم گھر میں رکھی ہوئی تھی اور اس کے بارے میں کس کس کو معلوم تھا ملزمان نے اسی گھر کا تعین کیوں کیا۔