وزیراعظم کا اشیائے خور و نوش کی قیمتوں میں اضافے کا نوٹس

ویب ڈیسک  اتوار 2 اکتوبر 2022
فوٹو: فائل

فوٹو: فائل

 لاہور: وزیراعظم شہباز شریف نے سیلاب کے بعد اشیائے خور و نوش کی قیمتوں میں اضافے کا نوٹس لیتے ہوئے قیمتوں کے فوری تعین کرنے کی ہدایت کردی۔

ایکسپریس نیوز کے مطابق وزیر اعظم شہباز شریف کی زیر صدارت سیلاب سے متاثرہ علاقوں میں امداد اور بحالی کی سرگرمیوں کے لیے جائزہ اجلاس ہوا، جس میں نیشنل فلڈ رسپانس کوآرڈینیشن سینٹر کے حکام نے ملک بھر میں سیلاب سے متاثرہ علاقوں میں بحالی کے کاموں کے بارے میں تفصیلی بریفنگ دی۔

وزیراعظم نے سیلاب متاثرین کو نقد امداد اور امدادی اشیا کی فراہمی میں کٹوتیوں سے متعلق شکایات کو فوری دور کرنے کی ہدایت دی جبکہ اشیائے خوردنی اور امدادی سامان کی فراہمی میں پیش آنے والے مسائل صوبائی حکومتوں کے تعاون سے فوری حل کرنے کی ہدایت کی۔

وزیر اعظم شہباز شریف نے سیلاب کے بعد اشیائے خور و نوش کی قیمتوں میں اضافے کا نوٹس لیتے ہوئے اشیائے خوردونوش کی قیمتوں کے تعین میں حائل مسائل فوری حل کرنے کی ہدایت کی۔

اس کے علاوہ انہوں نے سیلاب سے متاثرہ افراد کو خوراک اور امدادی اشیا کی بلاتعطل فراہمی کو یقینی بنانے کے لیے خصوصی ہدایات جاری کیں۔ انہوں نے شرکا سے گفتگو کرتے ہوئے کہا کہ سیلاب کی تباہ کاریوں سے ہونے والے نقصانات کا تخمینہ جلد از جلد مکمل کریں، سیلاب متاثرین کو نقد امداد اور امدادی اشیا کی فراہمی میں کٹوتیوں سے متعلق شکایات کو دور کیا جائے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔