تحفے میں ملنے والی نئی کار میں ریس لگاتا نوجوان حادثے میں ہلاک

اسٹاف رپورٹر  جمعـء 7 اکتوبر 2022
بلاول اپنے بھائی کے ساتھ ریس لگارہا تھا

بلاول اپنے بھائی کے ساتھ ریس لگارہا تھا

 کراچی: شہر میں ٹریفک حادثات میں دو افراد جاں بحق ہوگئے۔

یونیورسٹی روڈ پر وفاقی اردو یونیورسٹی گلشن اقبال کیمپس کے قریب دو گاڑیوں کے درمیان تصادم ہوگیا جس کے نتیجے میں نوجوان جاں بحق ہوگیا جبکہ گاڑی مکمل طور پر تباہ ہوگئی۔

واقعے کی اطلاع ملتے ہی پولیس اور ریسکیو ورکرز موقع پر پہنچ گئے اور جاں بحق شخص کی لاش اسپتال منتقل کی ، پولیس حکام کے مطابق متوفی کی شناخت بلاول ولد قربان کے نام سے کی گئی جس کی عمر تقریباً بائیس برس تھی۔

متوفی گلشن اقبال کا رہائشی جبکہ اس کا آبائی تعلق لاڑکانہ سے تھا ، اس کے والد نے اسے نئی کار دی تھی جس پر وہ اپنے ہی بھائی کے ساتھ ریس لگارہا تھا کہ اس دوران حادثے کا شکار ہوگیا۔

علاوہ ازیں قائد آباد میں بھی ٹریفک حادثہ ہوا جس میں نوجوان جان سے چلا گیا ، ریسکیو حکام کے مطابق لاش کی شناخت سلمان خان ولد دلشاد خان کے نام سے کی گئی جس کی عمر تقریباً پچیس برس تھی ، متوفی سڑک عبور کررہا تھا کہ حادثے کا شکار ہوگیا ، لاش کو ضابطے کی کارروائی کے لیے جناح اسپتال منتقل کیا گیا ۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔