بابراعظم نے کس ریکارڈ میں روہت، وارنر کو جوائن کرلیا؟

کرائسسٹ چرچ: قومی کرکٹ ٹیم کے کپتان بابراعظم نے ہدف کے کامیاب تعاقب میں زیادہ ففٹیز کا حصہ ڈالنے والے اوپنرز کی فہرست میں بھارت کے روہت شرما اور ڈیوڈ وارنر کو جوائن کرلیا۔

نیوزی لینڈ کیخلاف ٹرائنگولر سیریز میں بابر نے 10 ویں بار کسی میچ میں ففٹی کے ساتھ ٹیم کی فتح یقینی بنائی، بابراعظم نے اوپننگ پوزیشن کے علاوہ بھی ایک ایسی ففٹی بنائی جس میں گرین شرٹس سرخرو ہوئے۔

ہدف کے کامیاب تعاقب میں کسی بھی پوزیشن پر بیٹنگ کرتے ہوئے سب سے زیادہ ففٹیز بنانے کا ریکارڈ ویرات کوہلی کے پاس ہے، انھوں نے 15 فاتح اننگز کھیلی ہیں، بابراعظم اور ڈیوڈ وارنر 12،12 اننگز کے ساتھ مشترکہ طور پر دوسرے نمبر پر موجود ہیں۔

مزید پڑھیں: محمد رضوان نے کرس گیل، بابراعظم اور کوہلی کو پیچھے چھوڑ دیا

دوسری جانب بابراعظم نے 84 اننگز میں زیادہ ففٹیز کا ویراٹ کوہلی کا ریکارڈ برابر کردیا ہے، انھوں نے 28 بار یہ سنگ میل عبور کیا ہے۔

واضح رہے کہ آئی سی سی ٹی20 بیٹرز کی رینکنگ میں کپتان بابراعظم 3 نمبر پر موجود ہیں جبکہ محمد رضوان پہلی اور بھارت کے سوریا کمار دوسری پوزیشن پر قابض ہیں۔