لانگ مارچ کے شرکا کو فول پروف سکیورٹی فراہم کی جائے، وزیراعلیٰ پنجاب کی ہدایت

 لاہور: وزیراعلیٰ پنجاب پرویز الہٰی نے لانگ مارچ کے پورے روٹ پر امن عامہ برقرار رکھنے کیلئے خصوصی انتظامات کرنے کی ہدایت کردیں۔

ایکسپریس نیوز کے مطابق وزیراعلیٰ پنجاب چودھری پرویز الٰہی کی زیر صدارت اعلی سطح کا اجلاس منعقد ہوا جس میں لانگ مارچ کے سکیورٹی انتظامات اور پولیس فورس کی تعیناتی کا تفصیلی جائزہ لیا گیا، جس میں وزیراعلیٰ چودھری پرویزالٰہی نے لانگ مارچ کے لئے فول پروف سکیورٹی انتظامات کی ہدایت
کیں۔

وزیراعلیٰ پنجاب نے کہا کہ لانگ مارچ کے پورے روٹ پرامن عامہ برقرار رکھنے کیلئے خصوصی انتظامات کیے جائیں اور وضع کردہ سکیورٹی پلان پر من وعن عملدر آمد یقینی بنایا جائے۔

چودھری پرویزالٰہی نے حکم دیا کہ پولیس اور انتظامیہ عوام کے جان و مال کے تحفظ کیلئے کوئی کسر اٹھا نہ رکھے اور تمام متعلقہ ادارے بہترین کوآرڈینیشن کے تحت امن وامان کی صورتحال کو یقینی بنائیں۔

انہوں نے کہا کہ ٹریفک رواں دواں رکھنے کیلئے متبادل انتظامات کیے جائیں، کوآرڈینیشن کمیٹی روزانہ کی بنیاد پر میٹنگ کرے اورصورتحال کے تناظرمیں اقدامات کیے جائیں اور دیگر شہروں سے اضافی نفری فی الفور منگوا کر روٹ پر تعینات کی جائے۔

وزیراعلیٰ کا کہنا تھا کہ ڈرون اور سی سی ٹی وی کیمروں کے ذریعے لانگ مارچ کی مسلسل نگرانی کی جائے اور ڈیوٹی پر مامور اہلکاروں کے لئے کھانے کے بہترین انتظامات بھی کیے جائیں۔

پرویز الہٰی نے حساس علاقوں میں سکیورٹی کو مزید سخت کرنے کی ہدایت کرتے ہوئے کہا کہ لانگ مارچ کے شرکاء کو فول پروف سکیورٹی فراہم کی جائے گی۔

ان کا کہنا تھا کہ صوبے میں امن و امان کی صورتحال کو برقرار رکھنا ہماری پہلی ترجیح ہے، کیمروں کی مدد سے پورے روٹ کی نگرانی کی جائے گی، پولیس، انتظامیہ اور قانون نافذ کرنے والے دیگر ادارے ہمہ وقت چوکس ہیں۔

وزیراعلیٰ پنجاب کا اجلاس سے خطاب کرتے ہوئے کہنا تھا کہ شرپسند عناصر کے مذموم عزائم کو ناکام بنانے کیلئے پوری فورس الرٹ ہے۔

انہوں نے کہا کہ عمران خان نے کہا ہے کہ لانگ مارچ کے شرکاء پُرامن رہیں گے۔

سابق وفاقی وزیر مونس الٰہی، چیف سیکرٹری عبداللہ سنبل، پرنسپل سیکرٹری وزیراعلیٰ محمد خان بھٹی، انسپکٹر جنرل پولیس فیصل شاہکار، ایڈیشنل انسپکٹر جنرل اسپیشل برانچ، ایڈیشنل آئی جی آپریشنز پنجاب، اسپیشل سیکرٹری محکمہ داخلہ، ایڈیشنل آئی جی سی ٹی ڈی اور سی سی پی او لاہور سمیت دیگر حکام اجلاس میں شریک تھے۔