ٹنڈو آدم میں بجلی کا طویل بریک ڈاؤن، کاروباری سرگرمیاں ٹھپ

ٹنڈوآدم: ٹنڈوآدم شہر اور نواحی سیکڑوں دیہات میں بجلی کا طویل بریک ڈائون ، صبح 6 بجے سے شام 4 بجے تک بجلی بند رہی۔

10 گھنٹے تک بجلی بند رہنے کی وجہ سے کاروبار ٹھپ ہو کر رہ گیا جبکہ پانی کا بھی بحران پیدا ہوگیا۔ شہری پریشان، مساجد میں نمازیوں کو وضو کے لیے پانی نہ مل سکا۔طویل لوڈشیڈنگ کے بارے میں گرڈ اسٹیشن پر رابطہ کیا گیا تو انچارج عبدالطیف نے  حیسکو ٹنڈوآدم کے شعبہ آپریشن سے رابطہ کرنے کو کہا، حیسکو آپریشن کی جانب سے جواب ملا کہ شٹ ڈائون کے لیے ہمیں حیدرآباد سے احکام ملے ہیں۔ دوسری جانب شہریوں نے طویل لوڈشیڈنگ پر حیسکو چیف سے مطالبہ کیا کہ ٹنڈوآدم کے عوام دشمن افسران کے خلاف کارروائی کی جائے۔