پاکستانی شوبز ستاروں کی بم دھماکے پر ترک عوام سے اظہار یکجہتی
تقسیم اسکوائر پر سیاحوں کی بڑی تعداد موجود تھی، بم دھماکے میں 6 افراد جاں بحق اور 81 زخمی ہوئے تھے
پاکستان کے شوبز ستاروں نے ترکیہ کے شہر استنبول میں دھماکے میں ہونے والے جانی نقصان پر ترک عوام سے یکجہتی کا اظہار کیا ہے۔
اداکارہ مہوش حیات نے ٹوئٹر پر استنبول میں پیش آنے والے دہشت گردی کے واقعہ پر افسوس کا اظہار کیا ہے۔
انہوں نے لکھا'استنبول سے استقلال اسٹریٹ میں دھماکے کے نتیجے میں متعدد ہلاکتیں ہونے کی ایک افسوسناک خبر ملی ہے، میں تمام متاثرین اور ان کے اہل خانہ کے لیے دعاگو ہوں'۔
وینا ملک نے بھی اپنے ٹوئٹر اکاؤنٹ پر اپنا ردِعمل دیا ہے۔
اُنہوں نے اپنے ٹوئٹ میں لکھا کہ'یہ دل دہلا دینے والی خبر ہے، اللّٰہ تعالیٰ لواحقین کو صبر جمیل عطا فرمائے'۔
اداکار ہمایوں سعید نے اپنے ٹوئٹ میں لکھا کہ'استنبول سے ایک افسوسناک خبر موصول ہوئی ہے،جانوں کے ضیاع کے بارے میں جان کر بہت دکھ ہوا، اللّٰہ ان کی روحوں کو اپنی رحمت کے سائے میں رکھے اور زخمیوں کو صحت عطا فرمائے'۔
واضح رہے کہ گزشتہ روز دھماکا تقسیم اسکوائر پر ہوا جہاں سیاحوں کی بڑی تعداد موجود تھی، بم دھماکے میں 6 افراد جاں بحق اور 81 زخمی ہوئے تھے۔
