اسٹریٹ کرائم کی متعدد وارداتوں میں ملوث دو ڈکیت گرفتار

 کراچی: شہر قائد میں پولیس نے اسٹریٹ کرائم کی متعدد وارداتوں میں ملوث دو ڈکیتوں کو سی سی ٹی وی فوٹیج کی مدد سے گرفتار کرلیا۔

تفصیلات کے مطابق کھارادر پولیس نے اسٹریٹ کرائمز کی وارداتوں میں ملوث 2 ڈاکوؤں کو سی سی فوٹیج کی مدد سے گرفتار کرلیا ، ایس ایچ او کھاراد نند لال نے بتایا کہ گرفتار ڈکیتوں کی شناخت سمیر عرف راجو اور محمد یاسین عرف اویس کے نام سے کی گئی جو کہ سوشل میڈیا پر وائرل ہونے والی ایک فوٹیج میں فیڈرل بی ایریا کے علاقے میں کار سوار کو لوٹتے ہوئے دکھائی دے رہے تھے۔

انہوں نے بتایا کہ ملزمان گارڈن اور لیاری کے رہائشی ہیں، جن کے قبضے سے اسلحہ اور مسروقہ موٹر سائیکل برآمد ہوئی ہے جبکہ وہ ڈیفنس ، کلفٹن اور طارق روڈ سمیت دیگر علاقون میں اسٹریٹ کرائمز کی وارداتوں کے ساتھ ساتھ خواتین سے طلائی زیورات بھی چھینا کرتے تھے۔ گرفتار ملزمان عادی جرائم پیشہ ہیں اور اس سے قبل بھی وہ کئی مقدمات میں گرفتار ہو کر جیل جا چکے ہیں۔

پولیس ریکارڈ کے مطابق گرفتار ڈکیت سمیر عرف راجو سال 2021 میں ایس آئی یو پولیس کے ہاتھوں گرفتار ہوا تھا اور اس کے خلاف بارودی رکھنے کی ایکسپلوزیو ایکٹ اور انسداد دہشت گردی کی دفعہ سیون اے ٹی اے کے تحت مقدمہ بھی درج ہوا تھا ۔ پولیس گرفتار ڈاکوؤں سے ان کے گروہ میں شامل دیگر کارندوں کے حوالے سے مزید تحقیقات کر رہی ہے۔