علم ِفلکیات کی روشنی میں آپ کا یہ ہفتہ

برج حمل
سیارہ مریخ ، 21 مارچ تا 20 اپریل

ابتدائی ایام ممکن ہے مکان، والدہ یا آپ کی اپنی صحت کے لیے ناسازگار ہوں، لیکن 24 اور 25 تاریخوں میں کسی نیک شخصیت کی مداخلت، مدد یا مہربانی سے آپ اپنی مشکلات پر قابو پالیں گے۔ یہ وقت بیرون ملک، بزرگوں اور سنیئرز کے تعاون سے آپ کے مقدر کا چراغ روشن کرسکتا ہے۔ دوبارہ سوچنے کی ضرورت یا عادت بڑھ جائے گی کسی قریبی شخص کا رویہ اس سے دوری کی وجہ بن سکتا ہے۔

برج ثور
سیارہ زہرہ ، 21اپریل تا 20 مئی

پیر سے بدھ تک ازدواجی اور شراکتی افراد میں کچھ تلخ جذباتی گفتگو کا تبادلہ ہونے کا اندیشہ ہے۔ پُرسکون رہنے کی کوشش کریں۔ ایسے وقت میں گلا خراب ہوسکتا ہے، گلے پر زخم لگ سکتا ہے محتاط رہیں۔

جمعرات سے جمعہ آپ کے وراثتی امور میں مثبت ہلچل ہوتی نظر آرہی ہے۔ کوئی چھپر پھاڑ قسم کا مالی فائدہ ہوسکتا ہے اور یہ فائدہ دہرا ہوسکتا ہے، یعنی ایک سے زیادہ!

برج جوزا
سیارہ عطارد ، 21مئی تا 21 جون

آپ کے ساتویں خانے میں چار سیارگان کا ایک ہی وقت میں آجانا بتاتا ہے کہ کوئی اہم واقعہ رونما ہوسکتا ہے۔ اس کا تعلق آپ کی شادی/منگنی جیسے امر سے بھی ہوسکتا ہے۔
کسی اہم شادی یا تقریب میں شرکت کا بھی امکان موجود ہے۔ آپ کی عوامی زندگی میں بڑے خوب صورت لمحات آسکتے ہیں۔ آپ کا رویہ کچھ جارحانہ ہوسکتا ہے، اسے قابو میں رکھنے کی کوشش کریں۔

برج سرطان
سیارہ قمر ، 22جون تا 23 جولائی

چاند پانچویں یعنی اولاد کے خانے میں کیتو اور عقرب سے متاثر ہوگا۔ ایسا وقت حاملہ خواتین کو الرٹ کرتا ہے تاکہ اپنی صحت اور چیک اپ کا خصوصی خیال رکھیں۔ بچوں سے متعلق کوئی بات جذباتی اور مایوسی کی طرف لے جاسکتی ہے۔ بدھ اور جمعرات بزنس اور کام کاج میں نئی روح پڑ سکتی ہے۔ گرم جوشی سے حالات میں بہتری آسکتی ہے۔ ایک بہتر اور معاون وقت ہوسکتا ہے۔

برج اسد
سیارہ شمس ، 24جولائی تا 23 اگست

پیر اور منگل کو نیند متاثر ہوسکتی ہے۔ بیرون ملک سے کوئی پریشان کرنے والی خبر ملنے کا اندیشہ ہے گھر کی کوئی الجھن ہوسکتی ہے۔ معدہ متاثر ہوسکتا ہے۔ جمعرات اور جمعہ نیا چاند طلوع یعنی سورج اور چاند کا اولاد اور محبت کے خانے میں ہم کلام ہونا بتاتا ہے کہ کوئی اچھی خبر آپ کے دروازے پر دستک دے سکتی ہے۔ کوئی مالی فائدہ بھی ہوسکتا ہے۔ من پسند جگہ رشتہ طے ہوسکتا ہے۔

برج سنبلہ
سیارہ عطارد ، 24 اگست تا 23 ستمبر

کسی قریبی رشتے دار/پڑوسی یا دوست سے اختلافِ رائے کو شدید نہ ہونے دیں اور عارضی طور پر خاموش ہوجائیں تاکہ دوری پیدا نہ ہوسکے۔

بدھ سے جمعرات مکان کی تزئین و آرائش کا امکان پیدا ہوسکتا ہے۔ نئی گاڑی مل سکتی ہے نیا سیل یا لیپ ٹاپ مل سکتا ہے۔ نیا کیریئر بھی شروع ہوسکتا ہے۔ نیا چاند ایک نیا دروازہ کھول سکتا ہے۔

برج میزان
سیارہ زہرہ ، 24 ستمبر تا 23اکتوبر

صحت میں مسلسل جاری بگاڑ اب سنبھلنے کی طرف جاسکتا ہے۔ کسی اچھے معالج سے رابطہ ہوسکتا ہے۔ جب سعد وقت آتا ہے تو راکھ کی پڑیا بھی کشتۂ خاص کا کام کرجاتی ہے۔ نیا چاند تیسرے خانے میں طلوع ہونے جارہا ہے۔ سفر لازم ہوگا۔ آن لائن کام کا ضرور موقع ملے گا۔ قریبی عزیز سے میل ملاقات کا موقع ملے گا۔ آپ کی شخصیت میں ایک خوب صورت نکھار آتا دکھائی دیتا ہے۔

برج عقرب
سیارہ پلوٹو ، 24 اکتوبر تا 22 نومبر

آپ کے زائچے میں چاند مقدر کے خانے کا مالک یعنی نمائندہ ہے۔ مقدر بزرگوں کی دعا ہی سے منسوب ہوتا ہے زیارات/حج یا مرشد کی دعا سے مقدر کا ستارہ چمک جاتا ہے۔ ابتدائی دو ایام ممکن ہے کچھ جذباتی اور مایوس کن وقت ہو ایسے وقت میں کسی بھی قسم کے منفی قدم /سوچ سے گریز کریں اور ذرا سا صبر کرلیں، کیوںکہ بدھ سے جمعے تک ان ایام میں آپ کی جیب میں ستاروں کی چکاچوند روشنی سے جگمگ ہونے والا منظر ہوسکتا ہے۔ بڑا مالی فائدہ ہوسکتا ہے۔

برج قوس
سیارہ مشتری ، 23 نومبرتا 22 دسمبر

مریخ تعلقات اور رشتوں کے خانے میں الٹا چل رہا ہے۔ ازدواجی ساتھی کے بارے میں کسی قسم کے شکوک وشبہات کے شکار ہونے سے بچیں، چوتھے خانے میں مشتری حالتِ استقامت میں ہے گھر سے متعلق جاری الجھنیں سلجھاؤ کی سمت چل نکلیں گی۔

سب سے اہم بات یہ ہے کہ زحل تیسرے خانے میں سیدھا ہوچکا ہے۔ پراپرٹی اور سفر سے فائدے ہونے لگیں گے۔ نیا چاند آپ کے طالع میں طلوع ہورہا ہے۔ ایک شان دار توانائی جو آپ کو حالات کو سنبھالنے میں مدد دے گی میسر آجائے گی۔ ایک نیا باب شروع ہورہا ہے۔

برج جدی
سیارہ زحل ، 23 دسمبر تا 20 جنوری

کام میں نئی ترتیب کی ضرورت پڑے گی۔ کوشش کریں کہ تیزمزاج شخص کو کام پر نہ رکھیں۔ ورنہ مسئلہ ہوسکتا ہے۔ بجلی سے استعمال ہونے والی اشیاء کو محتاط ہوکے استعمال کریں۔ نقصان یا چوری کا اندیشہ موجود ہے۔ بیرون ملک/جیل/اسپتال اور روحانی کام کرنے والوں کے لیے ایک سازگار وقت ہونے کی امید ہے۔ کوئی نیا کام مل سکتا ہے یا جاری کام میں ایک زبردست قسم کی تبدیلی کا امکان ہے۔

برج دلو
سیارہ یورنیس ، 21 جنوری تا 19 فروری

زحل رجعت سے نکل چکا ہے۔ آپ کی دانش مندی اور دوراندیشی کا قبلہ درست سمت ہوتا ہوا نظر آتا ہے۔ اب آپ پر طاری جمود ایک گرم جوشی میں تبدیل ہوتا ہوا محسوس ہوتا ہے۔ آپ کی امیدوں /بڑے بہن بھائی اور پرانے دوستوں سے منسلک امیدیں بر آتی نظر آتی ہیں۔ بچوں کے بارے ممکن ہے کوئی الجھن آپ کو پریشان کرے، اس بارے میں محتاط رہیں۔

برج حوت
سیارہ نیپچون ، 20 فروری تا 20 مارچ

نیپچون اور مشتری دونوں طالع میں ہیں۔ مشتری جو کہ عزت ووقار اور آپ کے کیریئر کا مالک ہے دسویں گھر میں نیا چاند طلوع ہورہا ہے اور اس کے ساتھ زہرہ و عطارد بھی موجود ہیں۔ ایک نیا کیریئر یا ترقی یا ایک نئی کرسی بھی مل سکتی ہے۔ اضافی کام بھی مل سکتا ہے۔ یہ کام آپ کی مالی بہتری میں اہم کردار ادا کرے گا۔

پیر اور منگل کو اپنے بزرگوں اور سنیئرز سے اختلافِ رائے کو شدید نہ ہونے دیں اور اپنا نقطۂ نظر ان کے سامنے پیش کردیں نہ کہ تھوپنے کی کوشش کریں۔