پنجاب حکومت نے نادار فنکاروں کے لیے ٹرسٹ قائم کردیا

ویب ڈیسک  جمعرات 24 نومبر 2022
فوٹو فائل

فوٹو فائل

 لاہور: وزیراعلیٰ پنجاب چودھری پرویز الٰہی نے نادار فنکاروں کی فلاح وبہبود کے لئے ایک ارب روپے کے فنڈز پر مشتمل ٹرسٹ قائم کرنے کا اعلان کیا۔

ایکسپریس نیوز کے مطابق فنکاروں کے لئے خصوصی ٹرسٹ کے قیام کے لئے باقاعدہ قانون سازی کی جائے گی جبکہ امدادی فنڈز کی تقسیم کا طریقہ کار طے کرنے کے لئے بورڈ آف ٹرسٹی قائم کردیاگیا ہے جس کے سربراہ وزیراعلیٰ پنجاب ہیں۔

سیکرٹری اطلاعات بورڈ آف ٹرسٹی کے سیکرٹری،قوی خان،سید نور، سہیل احمد، نعمان اعجاز،جاوید شیخ، افتخار ٹھاکر، قیصر پیا، ثمینہ احمد، فیاض الحسن چوہان اور ٹھاکر لاہوری ممبر ہوں گے۔

دوسری طرف وزیراعلیٰ چودھری پرویز  الٰہی نے فنکاروں کے لئے ماہانہ امداد 5 ہزار سے 25 ہزار روپے کر دی ہے۔

وزیراعلیٰ چودھری پرویز الٰہی سے ملاقات کرنے والے فنکاروں نے ان اعلانات پر اظہار مسرت کرتے ہوئے وزیراعلٰی  شکریہ ادا کیا ہے۔

اس موقع پر پرنسپل سیکرٹری وزیراعلیٰ محمد خان بھٹی، محمد اقبال چودھری، اسد اللہ خان، آصف بلال لودھی اور دیگر بھی موجود تھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔