ٹویٹر2.0: ایلون مسک نے پلیٹ فارم میں نئے اضافے کی تفصیلات پیش کردیں

سان فرانسسکو: اب جبکہ ٹویٹر کا 65 فیصد عملہ ملازمت چھوڑ کر جاچکا ہے، اس کے نئے مالک ایلون مسک نے ٹویٹر کو مزید بہتر بنانے کے لیے چند نئی تجاویز پیش کی ہیں جسے تجزیہ کاروں نے ٹویٹر2.0 کا نام دیا ہے۔ ان کا مؤقف ہے کہ اس ضمن میں ایلون مسک کو مزید پروگرامر اور انجینیئر بھرتی کرنا ہوں گے۔

اس سے قبل ٹویٹر نے مختلف اکاؤنٹس کے لیے رنگوں کے کوڈ، اشتہارات کو درست صارف تک پہنچانے کی حکمتِ عملی اور ویب سائٹ میں ٹویٹس شامل کرنے کےبہتر آپشن بھی پیش کئے تھے۔ لیکن ایلون مسک نے اپنے نئے منصوبوں کو واضح انداز میں پیش کیا ہے۔

ایلون مسک نے کہا ہے کہ لوگ اب ٹویٹر پر زیادہ وقت گزاررہے ہیں اور اوسطاً ہر صارف 31 منٹ اور 30 سیکنڈ ٹویٹر پر صرف کررہا ہے۔ جہاں تک نئے صارفین کا سوال ہے تو وہ امریکا کی بجائے دیگر ممالک سے شامل ہورہے ہیں۔ لیکن ان کے پیشِ نظر ٹویٹر کو بطور مارکیٹنگ و تشہیر کے لیے استعمال کرنا ہے۔

انہوں نے کہا کہ بلیو ٹک کےلیے8 ڈالر کی فیس رکھنے کا مقصد دھوکے باز اور غلط اداروں کو بڑے اور معتبر اداروں کے نام سے اسپیم اور دھوکے بازی سے روکنا تھا۔

ایلون مسک نے ’اشتہارات بطور تفریح‘ کا ذکر کیا اور بتایا کہ اس میں خودکار سیمپلنگ کی سہولت ہوگی۔ دوسری جانب انہوں نے ٹویٹرصارفین کو رقم کمانے کے بہتر طریقہ کار سے بھی آگاہ کیا جو یوٹیوب کے 45 اور 55 فیصد کے مقابلے میں قدرے بہتر ہوگا۔ اس کےبعد انہوں نے خفیہ کاری (اینکرپشن) کے تحت براہِ راست پیغامات کا ذکر بھی کیا ہے اور کئی پلیٹ فارم اب اسے اپنا بھی رہے ہیں۔

اس کے علاوہ ایلون مسک نے طویل ٹویٹس پر مزید بات کی جنہیں ٹویٹر نوٹس کا نام دیا گیا ہے جو 2500 الفاظ تک ہوگی۔ ایلون نے ٹویٹر کے ذریعے براہِ راست رقم کی ترسیل، خریداری اور بل بھرنےکےسہولت کا بھی ذکر کیا۔