کراچی کے پولیس اسٹیشن میں پراسرار فائرنگ سے اہلکار زخمی

 کراچی: فائرنگ کے 2 مختلف واقعات میں پولیس اہلکار سمیت 2 افراد زخمی ہوگئے۔

پاکستان بازار تھانے کی حدود مکان نمبر117 سیکٹر سی 12 اورنگی ٹاؤن میں پراسرار فائرنگ سے ایک شخص زخمی ہوگیا ، اسے چھیپا ایمبولینس کے ذریعے عباسی شہید اسپتال منتقل کیا گیا۔

ترجمان کراچی پولیس کے مطابق زخمی ہونے والے شخص کی شناخت 30 سالہ وقار علی ولد منیر حسین کے نام سے کی گئی ، پولیس واقعے کی تحقیقات کر رہی ہے۔

ادھر ٹیپو سلطان پولیس اسٹیشن میں پراسرار فائرنگ سے پولیس اہلکار زخمی ہوگیا ، اسے طبی امداد کے لیے جناح اسپتال منتقل کیا گیا ، ترجمان کراچی پولیس کے مطابق زخمی ہونے والے اہلکار کی شناخت 30  سالہ عدیل یوسف کے نام سے کی گئی۔

زخمی اہلکار ٹیپوسلطان تھانے میں تعینات ہے ، پولیس کا دعویٰ ہے کہ اہلکار اپنے اسلحہ کی اتفاقیہ گولی چلنے سے زخمی ہوا ہے ، پولیس واقعے کی تحقیقات کر رہی ہے ۔