عمران خان کیخلاف توہین عدالت کیس معافی مانگنے پر ختم کیا گیا، تفصیلی فیصلہ

ثاقب بشیر  جمعرات 1 دسمبر 2022
فوٹو فائل

فوٹو فائل

 اسلام آباد: خاتون جج کو دھمکانے پر اسلام آباد ہائیکورٹ نے عمران خان کیخلاف توہین عدالت کی کارروائی ختم کرنے کا تفصیلی فیصلہ جاری کر دیا۔

 

عدالتی فیصلے میں کہا گیا ہے کہ چئیرمین پی ٹی آئی توہین کے مرتکب قرار ہوئے معافی مانگنے پر کیس ختم کیا گیا، کارروائی ختم کرنے پر تمام پانچ جج متفق مگر سابق چیف جسٹس اطہر من اللہ کی جانب سے شک کا فائدہ دینے سے جسٹس محسن اختر کیانی اور جسٹس بابر ستار نے اختلاف کیا۔

اسلام آباد ہائیکورٹ کی جانب سے جاری تفصیلی فیصلے میں واضح کیا گیا ہے کہ عمران خان نے خاتون جج کو تقریر میں دھمکی دے کر توہین عدالت ہی کی تھی ، صرف اس کے بعد دکھائے گئے کنڈکٹ پر معافی ملی۔

سابق چیف جسٹس اطہر من اللہ کی جانب سے تحریر کئے گئے فیصلے میں کہا گیا ایک سیاسی لیڈر کی جانب سے اس طرح کی تقریر کی توقع نہیں تھی لیکن انہوں نے اپنے الفاظ پر افسوس کا اظہار کیا، بیان حلفی دینے کے علاوہ خاتون جج کی عدالت معافی مانگنے بھی گئے، عدالت کے پاس کوئی وجہ نہیں کہ انہیں شک کا فائدہ نہ دیا جائے اور اسی بنیاد پر توہین عدالت کی کارروائی ختم کی جاتی ہے۔

جسٹس محسن اختر کیانی اور جسٹس بابر ستار نے فیصلے میں عمران خان کو معاف کرنے سے اتفاق مگر شک کا فائدہ دینے سے اختلاف کیا۔ جسٹس محسن اختر کیانی نے لکھا عمران خان پر فرد جرم ہی عائد نہیں ہوئی سو شک کا فائدہ دینے کے بجائے معاف کرنا ہی لکھا جانا چائیے۔

جسٹس بابر ستار نے لکھا کہ عمران خان کی تقریر توہین ہی تھی، سابق وزیر اعظم نے اشتعال انگیز تقریر کا اعتراف بھی کیا، سیاسی جماعتیں الیکشن کے سال میں بھی تنازعات بات چیت سے حل کرنے کو تیار نہیں، ایسے میں عدالتیں بھی متنازع ہوئیں تو قانونی فیصلہ کرنے والا کوئی ادارہ نہیں بچے گا.

فیصلے میں جسٹس بابر ستار نے اختلافی نوٹ میں کہا کہ کسی سیاستدان کا مرضی کے فیصلے کیلئے دباو ڈالنا نظر انداز نہیں کر سکتے ، عمران خان کو شک کا فائدہ نہیں، قانون کے مطابق معافی مانگنے پر کیس سے ڈسچارج کرتا ہوں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔