لالو پرساد کا کڈنی ٹرانسپلانٹ؛ بیٹی نے گردہ عطیہ کیا

سنگاپور سٹی: بھارت کے معروف سیاست دان اور سابق وزیراعلیٰ بہار 74 سالہ لالو پرساد یادیو کا تبدیلیٔ گردہ کا آپریشن سنگاپور میں ہوگیا۔

بھارتی میڈیا کے مطابق سابق وفاقی وزیر ریلوے اور سابق وزیراعلیٰ بہار لالو پرساد یادیو کا کڈنی ٹرانسپلانٹ کامیابی سے ہوگیا۔ ان کی بیٹی روہنی آچاریہ نے اپنا گردہ دیا۔ دنوں باپ اور بیٹی آپریشن کے بعد خیریت سے ہیں۔

تبدیلیٔ گردے کا آپریشن سنگاپور کے ایک اسپتال میں ہوا۔ اُن کی منجھلی بیٹی روہنی آچاریہ سنگاپور میں ہی قیام پذیر ہیں اور انھوں نے اکتوبر میں بتایا تھا کہ میں اپنے والد کو اپنا گردہ دوں گی اور آپریشن سنگاپور میں ہی ہوگا۔

https://twitter.com/RohiniAcharya2/status/1599560022467301376?s=20&t=gacZAhJWgSN35glPda_qDQ

کرپشن کے کیسز میں ضمانت پر رہا لالو پرساد یادیو طویل عرصے سے علیل ہیں۔ اکتوبر کو وہ سنگاپور گئے تھے تاکہ تبدیلیٔ گردہ کا آپریشن ہوسکے تاہم ضمانت کی مدت ختم ہونے پر انھیں واپس بھارت جانا پڑا تھا۔

بھارت پہنچ کر انھوں نے گردوں کے ناکارہ ہوجانے کے باعث طبی بنیادوں پر ضمانت کروائی اور سنگاپور پہنچے جہاں آج ان کا کڈنی ٹرانسپلانٹ ہوگیا۔ دونوں باپ بیٹی کو فی الوقت انتہائی نگہداشت کے وارڈ میں رکھا گیا ہے۔

https://twitter.com/yadavtejashwi/status/1599675635634667520?s=20&t=g4-axvrNX5MezbB51XwPmA

لالو پرساد یادیو ریاست بہار کے بے تاج بادشاہ ہیں اور ان کے ایک بیٹے اور بیٹی اب بھی بالترتیب ریاست کے ڈپٹی وزیراعلیٰ اور راجیہ سبھا کی رکن ہیں۔