پرتگال کے نوجوان اسٹرائیکر نامی گرامی فٹبالرز پر بھاری پڑگئے

کراچی: نوجوان گونسالو راموس نامی گرامی فٹبالرز پر بھاری پڑگئے جب کہ پرتگال کی جانب سے موقع ملتے ہی ورلڈ کپ میں پہلی ہیٹ ٹرک جڑدی۔

گونسالو راموس نے پرتگال کی جانب سے موقع ملتے ہی پہلے ورلڈ کپ اسٹارٹ کو ہی ہیٹ ٹرک سے یادگار بنالیا، ان کی شاندار کارکردگی کی بنیاد پر ٹیم نے سوئٹزرلینڈ کو 6-1 سے مات دے کر 16 برس بعد پہلی مرتبہ کوارٹر فائنل کھیلنے کا اعزاز حاصل کیا۔

کوچ فرانانڈو سانتوس نے ملک کے آل ٹائم ٹاپ اسکورر کرسٹیانو رونالڈو کو بینچ پر بٹھاتے ہوئے بینفیشا کے فارورڈ راموس کو لائن کی لیڈنگ کا موقع دیا، 21 سالہ فٹبالر نے ورلڈ کپ سے صرف 3 روز قبل ایک دوستانہ میچ میں ڈیبیو کیا تھا، اس مقابلے سے قبل قطر میں انھیں بطور متبادل صرف 10 منٹ کھیلنے کا موقع میسر آیا تھا مگر انھوں نے میدان میں ثابت کردیا کہ وہ بڑے اسٹیج کے ہی کھلاڑی ہیں۔

راموس نے مقابلے میں کرسٹیانو رونالڈو کی کمی محسوس ہی نہیں ہونے دی جنھیں آخر میں متبادل کے طور پر میدان میں اتارا گیا ،انھوں نے گول پوسٹ پر ایک حملہ بھی کیا مگر آئوٹ سائیڈ کی وجہ سے گول شمار نہیں ہوا۔

راموس نے پہلا گول 17 ویں منٹ میں کیا، کپتان پیپے نے 33 ویں منٹ میں برتری کو دگنا کیا، وقفے پر پرتگال کو2-0سے برتری حاصل تھی، کھیل دوبارہ ہوئے 6 منٹ ہی ہوئے تھے کہ راموس نے ڈائیگو ڈالوٹ کے کراس پر گیند جال میں پہنچا دی۔

رافیل گورینو نے گول کرکے ٹیم کی برتری کو4-0کیا، 58 ویں منٹ میں سوئٹزرلینڈ کے مینیول اکانجی نے گول کرکے خسارہ کم کرنے کی کوشش کی، راموس نے 67 منٹ میں اپنا تیسرا جبکہ آخری لمحات میں رافیل لیو نے ٹیم کا چھٹا گول کرکے پرتگال کو6-1سے فتح دلادی۔