مارننگ گلوری کے پاکستانی عملے کو لیبیا میں سفارتخانے کے حوالے کردیا گیا، دفتر خارجہ

اسلام آباد: دفتر خارجہ کی ترجمان تسنیم اسلم کا کہنا ہے کہ مارننگ گلوری کے پاکستانی عملے کو لیبیا میں سفارتخانے کے حوالے کردیا گیا ہے۔

ایکسپریس نیوز سے خصوصی گفتگو کرتے ہوئے تسنیم اسلم نے کہا کہ مارننگ گلوری میں موجود پاکستانی عملے کو رہائی کے بعد اب سفارتخانے کے حوالے کردیا گیا ہے، تمام پاکستانی خیریت سے ہیں اور ان کی وطن واپسی کے لئے انتظامات کئے جارہے ہیں۔

واضح رہے کہ لیبیا کے باغیوں کے ہاتھوں ہائی جیک ہونے والے مارننگ گلوری کو امریکی بحریہ نے کارروائی کرکے آزاد تو کروا لیا تھا لیکن اس کے باوجود جہاز کے عملے کی تکلیف کم نہ ہوئی اور حکومت اور باغیوں کے درمیان کشیدگی کے باعث عملے نے گزشتہ کئی دن انتہائی اذیت میں گزارے جبکہ اس دوران عملے کے اہل خانہ بھی ذہنی اذیت میں مبتلا رہے۔