پاک انگلینڈ ٹیسٹ میچ، ٹریفک کیلیے متبادل راستوں کا اعلان

 کراچی:  پاکستان اور انگلینڈ کے درمیان ٹیسٹ میچ کے دوران ٹریفک کے لیے متبادل راستوں کا اعلان کر دیا گیا۔

حسن اسکوائر سے اسٹیڈیم کی جانب جانے والا روڈ بند رہے گا، پارکنگ کا انتظام ایکسپو سینٹر میں کیا گیا ہے۔ شائقین کو اصل شناختی کارڈ اور میچ پاس دکھانا لازم ہوگا۔

تفصیلات کے مطابق نیشنل اسٹیڈیم میں 17 دسمبر سے 21 دسمبر تک پاکستان اور انگلینڈ کے درمیان ٹیسٹ میچ کھیلا جائے گا، اس موقع پر ٹریفک پولیس نے ٹریفک کے لیے متبادل راستوں کا اعلان کر دیا۔

حسن اسکوائر فلائی اوور سے اسٹیڈیم کی جانب ٹریفک جانے کی اجازت نہیں ہوگی، اسی طرح یونیورسٹی روڈ پر ایکسپو سینٹر ٹرننگ بھی بند رہے گا۔

اسٹیڈیم روڈ سے حسن اسکوائر کی جانب ٹریفک چلتا رہے گا ، ہر قسم کی ہیوی ٹریفک کا داخلہ بھی ممنوع ہوگا۔

شہر کے مختلف علاقوں سے میچ دیکھنے کے لیے آنے والے شائقین اپنی گاڑیاں ایکسپو سینٹر میں پارک کرسکیں گے جنھیں شٹل سروس کے ذریعے اسٹیڈیم پہنچایا جائے گا، پارکنگ کے لیے اصل قومی شناختی کارڈ اور میچ کا پاس دکھانا لازمی ہوگا۔