اسلام آباد ہائی کورٹ نے اعظم سواتی کی درخواست مسترد کردی

اسلام آباد ہائی کورٹ نے اعظم سواتی کی دیگر صوبوں سے مقدمات کی تفصیلات طلب کرنے کی درخواست مسترد کرتے ہوئے کہا ہے کہ اعظم سواتی کے خلاف کیسز عدالتی اختیار سے باہر کے ایریا میں ہوئے اس لیے ہم سندھ اور بلوچستان کو حکم جاری نہیں کر سکتے، پٹشںنر متعلقہ فورمز سے رجوع کر سکتا ہے۔

چیف جسٹس عامر فاروق نے اعظم سواتی کی درخواست پر 2 دسمبر سے محفوظ فیصلہ جاری کردیا، عدالت نے فیصلے میں کہا ہے کہ صغراں بی بی کیس کے فیصلہ کے تحت ایک واقعہ کی دو ایف آئی آرز درج نہیں ہو سکتیں تاہم سپریم کورٹ کے فیصلے پر عمل کے لیے میکنزم بن سکتا ہے۔

فیصلے میں کہا گیا ہے کہ ملک بھر کے پولیس اسٹیشنز لنک کرنے کے لیے کوئی سسٹم بنایا جا سکتا ہے، وزارت داخلہ یا کوئی ایجنسی میکنزم بنا سکتی ہے کہ ایف آئی آر کی معلومات دستیاب ہوں، اتھارٹیز اس حوالے سے کوئی اور میکنزم بھی تجویز کر سکتی ہیں۔

عدالت نے اپنے فیصلے میں لکھا ہے کہ اپنے خلاف زیر التوا مقدمات کی معلومات لینا ملزم کا حق نہیں البتہ ملزم کے خلاف کوئی کیس رجسٹرڈ ہو جائے تو وہ اس کی کاپی حاصل کر سکتا ہے۔

عدالت نے درخواست نمٹاتے ہوئے مزید کہا کہ اعظم سواتی کے پاس متعلق فورمز موجود وہاں رجوع کر سکتے ہیں۔