وزیراعظم نوازشریف نے سرکاری ملازمتوں پر عائد پابندی اٹھالی

اسلام آباد: وزیراعظم نواز شریف نے سرکاری ملازمتوں پر عائد پابندی ختم کرتے ہوئے محکموں کو ضروری عملے کی بھرتی کی اجازت دے دی۔

ایکسپریس نیوز کے مطابق وزیر اعظم نواز شریف نے سرکاری اداروں میں کئی سال سے عائد پابندی اٹھاتے ہوئے وزارتوں، اداروں اور ڈویژنوں میں ضروری بھرتیوں کی اجازت دے دی، پابندی کے خاتمے کے بعد وزارت خزانہ، وزارت صنعت و پیداوار، وزارت خارجہ اور تجارت سمیت دیگر وزارتوں میں بھرتی ہوسکے گی۔

واضح رہے کہ کئی سال سے سرکاری محکموں میں بھرتیوں پر پابندی کی  وجہ سے وزارتوں، ڈویژنوں اور مختلف اداروں میں ہزاروں اسامیاں خالی ہیں جب کہ کئی سرکاری اداروں میں ملازم ڈیلی ویجز اور کنٹریکٹ پر کام کررہے ہیں۔