نوشہرہ میں سلنڈر پھٹنے سے عمارت منہدم ملبے سے 3 لاشیں اور چار زخمیوں کو نکال لیا گیا

جائے حادثہ پر امدادی ٹیموں کا ملبے سے لاشوں اور زخمیوں کو نکالنے کے آپریشن کا منظر (فوٹو : ایکسپریس)

---

خیبرپختون خوا کے شہر نوشہرہ میں گیس سلنڈر پھٹنے سے رہائشی عمارت منہدم ہوگئی، ملنے میں دبنے سے نومولود بچی سمیت تین افراد جاں بحق اور چار زخمی ہوگئے، تمام افراد کو ملبے سے نکال لیا گیا۔

ایکسپریس نیوز کے مطابق نوشہرہ کے علاقے تحصیل پبی واپڈا کالونی E سیکٹر کے ایک رہائشی گھر میں سلنڈر دھماکا ہوا۔ ریسکیو کنٹرول روم کو اطلاع ملتے ہی ریسکیو 1122 کی امدادی ٹیموں نے موقع پر پہنچ کر امدادی کاروائیاں شروع کردیں۔



ابتدائ اطلاعات کے مطابق سلنڈر بلاسٹ کی صورت میں عمارت منہدم ہوگئی اور متعدد افراد پھنس گئے جنہیں نکالنے کا سلسلہ جاری ہے، ریسکیو 1122 نوشہرہ کی فائر میڈیکل اور ڈیزاسٹر ٹیموں کی امدادی ٹیمیں ملبے سے شہریوں کو نکالنے میں مصروف ہیں۔

امدادی ادارے کے مطابق اب تک تین لاشوں اور چار زخمیوں کو نکال کر ہسپتال منتقل کیا گیا ہے، جاں بحق افراد میں واجد عمر 30 سال اس کی اہلیہ 19 سال اور ایک نومولود بچی شامل ہیں جب کہ زخمیوں میں نیاز بی بی عمر 50 سال، زبیر عمر 33 سال، نمرہ عمر 9 سال، مصطفیٰ عمر 5 سال شامل ہیں۔



بعدازاں امدادی ادارے نے ملبے میں لاشیں ڈھونڈنے کا ریسکیو آپریشن مکمل کرنے کا اعلان کردیا۔

دریں اثنا پشار کے علاقے گجر آباد کی ایک دکان میں گیس سلنڈر پر اچانک آگ لگ گئی۔ ریسکیو 1122 کے اہل کاروں نے موقع پر پہنچ کر آگ بجھانے کا عمل شروع کر دیا۔

ڈسٹرکٹ ایمرجنسی آفیسر انجینئر نوید اختر نے بتایا کہ فائر فائٹرز نے پیشہ ورانہ طریقے سے 10 منٹ کے اندر آگ پر مکمل طور پر قابو پا لیا اور بروقت کارروائی سے پوری دكان کو جلنے سے بچالیا۔