چور ٹرک کے تالے توڑ کر 9 کروڑ روپے کی پینٹنگز لے اُڑے

ویب ڈیسک  منگل 10 جنوری 2023
امریکی شہر بولڈر کے ایک ٹرک سے پانچ قیمتی پینٹنگ چوری ہوگئی ہیں جن کی مالیت 9 کروڑ روپے سے زائد بتائی جارہی ہے۔ فوٹو: سی این این

امریکی شہر بولڈر کے ایک ٹرک سے پانچ قیمتی پینٹنگ چوری ہوگئی ہیں جن کی مالیت 9 کروڑ روپے سے زائد بتائی جارہی ہے۔ فوٹو: سی این این

کولاراڈو: بولڈر شہر میں ایک مکمل طور پر مقفل ٹرک سے پانچ شاہکار پینٹنگ چوری ہوگئیں جس کی تلاش میں پولیس سرگرداں ہیں۔ مصوری کے ان شاہکار کی قیمت 4 لاکھ ڈالر تھی جو پاکستانی روپوں میں 9 کروڑ 12 لاکھ روپے بنتی ہے۔

شہری انتظامیہ کے مطابق یہ پیٹنگ 14 دسمبر کی شام سے لے کر صبح تک کے وقت میں چوری ہوئی ہیں۔ ٹرک ڈرائیور اور اس کا معاون عملہ شام کو ایک ہوٹل میں رکا تھا۔ جب صبح وہ ٹرک پر پہنچے تو اس کا مضبوطی سے بند کیا گیا دروازہ اور تالا وغیرہ ٹوٹا ہوا تھا۔ معلوم ہوا کہ اندر رکھی پانچ پینٹنگ اور ان کے ساتھ کچھ اوزار بھی غائب ہیں۔

ٹرانسپورٹ اسٹاف کے مطابق اس خزانے میں امریکی فن کار ارنسٹ مارٹن ہیننگز کی مشہور تخلیق ’لگونا پیبلو‘ بھی موجود تھی۔ اس کےعلاوہ جوزف ہنری شارپ کی تخلیق ’ویوز آف ٹاؤس پیبلو‘ ایلن ڈی کوننگ، جین فرائلیشر اور اینگر ارونگ کوز کا اہم کام بھی شامل تھا۔ ان تصاویر میں لینڈ اسکیپ پینٹنگ بھی شامل تھی۔

تاہم افسران نے یہ نہیں بتایا کہ قیمتی تصاویر کس میوزیئم سے لی گئی تھیں اور کہاں لے جائی جا رہی تھیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔