ملک کو مقروض در مقروض کرکے عالمی ایجنڈے پرعمل درآمد کیا، فضل الرحمٰن

 پشاور: وفاقی حکومت کے اتحادی مولانا فضل الرحمٰن نے کہا ہے کہ ملک کو ڈیفالٹ کرنے کی تیاریاں عروج پر تھیں لیکن سیاسی جماعتوں نے ملکر اپنی سیاست داؤ پر لگاکر ملک کو ڈیفالٹ ہونے سے بچایا۔

ان خیالات کا اظہار جمعیت علمائے اسلام (ف) کے سربراہ اور پی ڈی ایم کے مرکزی رہنما مولانا فضل الرحمٰن نے پشاور میں گفتگو کرتے ہوئے کیا، انہوں نے کہا کہ ملک میں ایک سوچی سمجھی سازش کے تحت عدم استحکام پیدا کیا گیا اور ملک کو مقروض در مقروض کرکے بین الاقوامی ایجنڈے پر عمل درآمد کیا گیا۔

ان کا کہان تھا کہ ملک کو ڈیفالٹ کرنے کی تیاریاں عروج پر تھیں لیکن سیاسی جماعتوں نے ملکر اپنی سیاست داؤ پر لگاتے بوئے ملک کو ڈیفالٹ ہونے سے بچایا۔

سربراہ جے یو آئی نے کہا کہ اقتدار چھن جانے کے بعد ملک میں آٹے کا بحران پیدا کیا گیا اگرچہ صوبائی حکومت ان سازشوں میں براہ راست ملوث تھیں لیکن مرکزی حکومت کے خلاف پروپیگنڈہ کیا گیا۔

مولانا فضل الرحمٰن نے سابق وزیراعظم عمران خان اور سابقہ حکومت کو تنقید کا نشانہ بناتے ہوئے کہا کہ چار سال مرکزی حکومت نے آئی ایم ایف, ورلڈ بنک کے ساتھ معاہدے کرکے قومی معیشت کا بیڑہ غرق کیا اور ملک میں اسلامی اقدار کے خاتمے اور مغربی کلچر مسلط کرنے کے لیے نوجوان نسل کو استعمال کیا۔

انہوں نے کہا کہ بیرونی ایجنڈے کے تحت خیبرپختونخوا کے خطہ میں اسلام کی مضبوط جڑوں کو کاٹنے کے لئے تحریک انصاف کو استعمال کیا گیا، اب دوبارہ اقتدار میں آنے کے لیے ملکی سالمیت کو داؤ پر لگایا جارہا ہے، جمعیت علماء اسلام اس فتنے کے خلاف روز اول سے جدوجھد کررہی ہے اور یہ جدوجھد جاری رکھے گی۔

رہنما پی ڈی ایم کا کہنا تھا کہ مغربی ایجنڈے کو ملک پر مسلط کرنے کے لیے اسرائیل اور انڈیا تحریک انصاف کو استعمال کررہے ہیں، مجھے براہ راست بتایا گیا کہ بین الاقوامی ایجنڈے کے لیے عمران خان سے موزوں کوئی شخص نہیں چنانچہ اسکو مسلط کرنے کے لیے سلیکٹ کیا گیا۔