ناراض بلوچوں کو مذاکرات سے قومی دھارے میں لایا جائے ، صدر ممنون

کوئٹہ: صدر مملکت ممنون حسین نے کہا ہے کہ بلوچستان کی ترقی کیلیے وفاقی حکومت بھرپور کردار ادا کر رہی ہے۔

بلوچستان کے مسئلے کو حل کرنے کیلیے بلوچوں کو قومی دھارے میں لائیں گے اور جلد ہی بلوچستان خوشحال صوبہ بنے گا۔ انھوں نے وزیراعلیٰ بلوچستان ڈاکٹر عبدالمالک بلوچ کی قیادت میں صوبائی وزرا‘ اراکین اسمبلی سے ملاقات میں کہا کہ بلوچستان حکومت امن وامان کی بحالی کیلیے اقدامات کرے، وفاقی حکومت ان کو مکمل سپورٹ کریگی، عوام کا معیار زندگی بہتر کرنے کیلیے تمام وسائل فراہم کیے جائیں گے، لوگوں کی جان ومال کا تحفظ حکومت کا فرض ہے، ناراض بلوچ بھائیوں کو قومی دھارے میں لایا جائے اور ان سے بات چیت کی جائے کیونکہ بات چیت کے ذریعے ہی مسائل حل ہو سکتے ہیں۔ اس موقع پر گورنر بلوچستان محمد خان اچکزئی‘ وفاقی وزیر سرحدی امور جنرل(ر) عبدالقادر بلوچ بھی موجود تھے۔

صوبائی کابینہ اور ارکان اسمبلی نے صدر مملکت کو لوڈشیڈنگ، بیروزگاری سمیت دیگر مسائل سے آگاہ کیا۔ علاوہ ازیں صدر مملکت سے گورنر ہاؤس کوئٹہ میں گورنر اور وزیراعلیٰ بلوچستان نے علیحدہ علیحدہ ملاقات کی اور امن وامان سمیت دیگر سیاسی صورتحال کے بارے میں آگاہ کیا۔ قبل ازیں صدر مملکت بلوچستان کے دو روزہ دورے پر کوئٹہ ائیرپورٹ پر پہنچے تو وزیراعلیٰ بلوچستان، صوبائی وزراء سمیت سول اور فوجی حکام نے انکا شاندار استقبال کیا۔ اے پی پی کے مطابق صدر ممنون ائیرپورٹ سے بذریعہ ہیلی کاپٹر خالد بیس اور وہاں سے کمانڈ اسٹاف کالج پہنچے اور فوجی افسران سے خطاب کیا، انھوں نے وزیٹر بک میں تاثرات بھی نوٹ کیے۔