50 منٹ کچن کی صفائی سائیکل چلانے سے زیادہ کیلوریز جلاتی ہے

کیمبرج شائر: عموماً لوگوں کو گھر کی صاف صفائی کرنے میں انتہائی اکتاہٹ ہوتی ہے لیکن ایک تحقیق میں معلو ہوا کہ 50 منٹ کچن کی صفائی کرنے سے سائیکل چلانے سے زیادہ کیلوریز (حرارے) جلائی جا سکتی ہیں۔

تحقیق کے مطابق کچن کی صفائی اوسطاً 276 کیلوریز جبکہ باتھ روم کی صفائی 173 اور بیڈروم کی صفائی 154 کیلوریز جلاتی ہے۔

تحقیق میں 10 پیشہ ور صفائی کرنے والوں کو فِٹ بِٹس (ایک برقی آلہ جس کو قدم گننے اور دل کی دھڑکن کی پیمائش کے لیے کلائی پر پہنایا جاتا ہے) پہنا کر پانچ، پانچ گھروں کی صفائی کا کام دیا گیا۔

جمع کیے جانے والے ڈیٹا سے معلوم ہوا کہ اوسطاً 50 منٹ کی کچن کی صفائی سے ایک گھنٹہ سائیکل چلانے کی نسبت زیادہ کیلوریز جلائی جاسکتی ہیں۔

تاہم، یہ عمل وزن کم کرنے میں مدد نہیں دے سکتا کیوں کہ اس میں دیگر ورزش کے مقابلے میں کم پٹھے حرکت کرتے ہیں۔

برطانوی کاؤنٹی کیمبرج شائر سے تعلق رکھنے والے ایک ٹرینر جو مِٹن کے مطابق جھک کر صفائی کرنے کے بجائے ہمیں کوشش کرنی چاہیئے کہ ہم اکڑوں بیٹھ کر صفائی کریں۔