دنیا کے سب سے بڑے ’کیک لباس‘ کی ویڈیو وائرل

برن: سوئزرلینڈ کی ایک مشہور بیکری کو اپنی مزید مشہوری کے لیے یہ کام سوجھا کہ اس نے دلہن کا سفید لباس بنایا ہے جو پورا کیک سے بنا ہے۔ اب اس کی تصدیق گنیزبک آف ورلڈ ریکارڈ نے بھی کی ہے۔

گنیز بک آف ورلڈ ریکارڈ کے سامنے ایک لباس نما کیک پیش کیا گیا تھا جس کا اوپر والا قمیض نما حصہ عام کپڑے کا تھا جبکہ نیچے کا وسیع فراک نما حصہ مکمل طور پر کیک سے بنایا گیا تھا۔ اسے بنانے میں غیرمعمولی مہارت درکار تھی۔ اس طرح لباس کا وزن بڑھ کر 289 پاؤنڈ ہوگیا جس لگ بھگ 130 کلوگرام بنتا ہے۔

اپنے تمام اطمینان کے بعد گنیز بک آف ورلڈ ریکارڈ نے کہا کہ سوئزرلینڈ میں شادی سے متعلق نمائش میں پیش کیا گیا یہ لباس سویٹی کیکس نے بنایا تھا۔ اس کی روحِ رواں، نتاشا کولائن فیہ لی فوکاس نے پیش کیا تھا اور اسی نام سے سند بھی پیش کی گئی ہے۔

گنیز بک نے اسے دنیا کا سب سے بڑا پہنا جانے والے کیک بھی قرار دیا ہے۔ اس کی ویڈیو یوٹیوب پر جاری کی گئی ہے جسے دیکھ کرلوگ حیران ہورہے ہیں۔ تقریب ختم ہونے کے بعد میٹھے کے شوقین افراد نے اسے کاٹنا شروع کیا اور سارا لباسِ عروسی والا کیک تھوڑی دیر میں ہڑپ کرلیا گیا۔