بھارت میں باپ نے بچے کو جنم دیدیا

ویب ڈیسک  جمعرات 9 فروری 2023
ٹرانس جینڈر جوڑے نے نومولود کی جنس سے متعلق نہیں بتایا (فوٹو فائل)

ٹرانس جینڈر جوڑے نے نومولود کی جنس سے متعلق نہیں بتایا (فوٹو فائل)

نئی دہلی: بھارت میں ٹرانسجینڈر باپ نے صحت مند بچے کو جنم دے دیا۔بھارت میں یہ پہلا ٹرانس جینڈر جوڑا ہے جن کے ہاں بچے کی پیدائش ہوئی ہے۔

بھارتی ریاست کیرالہ سے تعلق رکھنے والا ٹرانس جینڈر جوڑا اپنے حمل کے فوٹو شوٹ کے بعد خبروں میں تھا، جس  کے 2 ماہ بعد بچے کی پیدائش متوقع تھی، تاہم وقت سے پہلے ہی بدھ 8 فروری کو اس ٹرانس جینڈر جوڑے نے سرکاری اسپتال میں آپریشن کے بعد صحت مند بچے کو جنم دیا۔

یہ بھی پڑھیں: بھارت میں ٹرانس جینڈر جوڑے کے ہاں بچے کی پیدائش متوقع

ٹرانس جینڈر جوڑے ضیا پاؤل اور زہد نے اب تک اپنے بچے کی جنس سے متعلق نہیں بتایا مگر ضیا نے اپنی خوشی کا اظہار کرتے ہوئے کہا  کہ آج ان کی زندگی کا سب سے اچھا دن ہے، نومولود اور زہد دونوں خیریت سے ہیں۔

یاد رہے کہ ٹرانس جینڈر بھارتی جوڑا 3 سال سے ساتھ ہے۔ ضیا پاؤل ایک مرد تھا، جو جنس تبدیل کرکے عورت بن گیا جب کہ زہد ایک عورت تھی جو اپنی جنس تبدیل کروا رہی تھی کہ اسی دوران حمل ٹھہر گیا۔ ٹرانس جینڈر جوڑے نے ہارمون تھراپی کے ذریعے اپنی جنس تبدیل کروائی تھی۔ زہد کے نسوانی تولیدی اعضا کا آپریشن نہیں ہوا تھا، اسی طرح ابھی ضیا نے بھی مردانہ تولیدی اعضا کا آپریشن نہیں کروایا تھا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔