پی ایس ایل 8؛ ملتان سلطانز کم بیک کے خواہاں، آج کوئٹہ گلیڈی ایٹرز سے مقابلہ

 لاہور: پی ایس ایل 8میں ملتان سلطانز کم بیک کے خواہاں ہیں جب کہ آج کوئٹہ گلیڈی ایٹرز سے مقابلہ ہوگا۔

پی ایس ایل کے سیزن 8 میں آج ملتان سلطانز کا مقابلہ کوئٹہ گلیڈی ایٹرز سے ہوگا، میزبان ٹیم ہوم گراؤنڈ پر پہلے معرکے میں سرخرو نہیں ہوسکی۔

لاہور قلندرز نے سنسنی خیز معرکے میں ایک رن سے فتح پائی،کپتان محمد رضوان اور شان مسعود اچھی فارم میں ہیں، ڈیوڈ ملر، کیرون پولارڈ اور خوشدل شاہ بھی میچ ونر ہیں،البتہ انھیں اچھے آغاز کو بڑے اسکور میں تبدیل کرنے کیلیے ذمہ داری کا مظاہرہ کرنا ہوگا۔

یہ بھی پڑھیں؛ پشاور زلمی نے کراچی کنگز کو 2 رنز سے شکست دے دی

بولرز میں اسامہ میر نے کراچی کنگز کو جوائن کرنے والے عمران طاہر کا خلا بخوبی پر کیا، احسان اللہ بھی اچھی فارم میں ہیں،عقیل حسین، شاہنواز دھانی اور ثمین گل کو لائن و لینتھ بہتر بنانا ہوگی۔

دوسری جانب گزشتہ سیزن کی بانسبت متوازن نظر آنے والا کوئٹہ گلیڈی ایٹرز کا اسکواڈ بھی  مہم کا فاتحانہ آغاز کرنے کا عزم لیے میدان میں اترے گا، مارٹن گپٹل اور جیسن روئے چھکے چھڑا سکتے ہیں۔

یہ بھی پڑھیں: لاہور قلندرز نے اچھی کارکردگی پر فخر زمان کو پلاٹ دے دیا

کپتان سرفراز احمد اننگز کو استحکام دینے کے اہل ہیں، افتخار احمد، عمر اکمل اور محمد نواز بھی بڑا اسکور بنانے کی صلاحیت رکھتے ہیں۔ محمد حفیظ  متبادل کے طور پر اسکواڈ کا حصہ بن چکے ہیں،پیس بیٹری میں نسیم شاہ اور محمد حسنین  امیدوں کا محور ہوں گے۔

اوڈین اسمتھ بھی کارآمد میڈیم پیسر ہیں، وانندو ہسارنگا، محمد نواز اور افتخار احمد اسپن بولنگ کا جادو جگائیں گے،حفیظ اگر پلیئنگ الیون کا حصہ بنے تو ان کی سلو بولنگ بھی لیفٹ ہینڈڈ بیٹرز کے لیے مشکلات پیدا کرسکتی ہے۔