ڈرائیورز کی ہڑتال، دولہا رات بھر پیدل سفر کرکے دلہن کے پاس پہنچ گیا

بھارتی ریاست اوڈیشہ میں دولہا اور اس کے خاندان کے افراد کو دلہن کی رخصتی کیلئے پوری رات پیدل سفر کرکے صرف اس لیے جانا پڑا کہ ریاست بھر میں ڈرائیورز نے ہڑتال کی ہوئی تھی۔

بھارتی میڈیا رپورٹس کے مطابق یہ واقعہ اوڈیشہ کے ضلع رائگڑا میں پیش آیا جہاں دولہے اور اس کے گھر والوں کو دلہن لینے کیلئے 28 کلومیٹر پیدل سفر کرنا پڑا۔

ڈرائیوروں کی ہڑتال کے باعث دولہا اور اس کے اہل خانہ شادی کے لیے گاڑی کا بندوبست نہیں کر سکے تھے۔ وہ سناکھنڈی گاؤں سے جمعرات کی رات کو چلے اور صبح دیبالاپاڑو گاؤں پہنچے جہاں شادی کی تقریب ہوئی۔

دولہے کے اہل خانہ میں سے ایک کا کہنا تھا کہ ڈرائیوروں کی ہڑتال کی وجہ سے کوئی ٹرانسپورٹ دستیاب نہیں ہے۔ ہم رات بھر پیدل چل کر گاؤں پہنچے۔ ہمارے پاس کوئی اور راستہ نہیں تھا۔

شادی جمعہ کی صبح ہوئی تاہم دولہا اور اہلخانہ کو ڈرائیورز ایسوسی ایشن کی جانب سے ہڑتال کے باعث دلہن کے گھر ہی ٹھہرنا پڑا۔

واضح رہے کہ سماجی بہبود کے اقدامات جیسے انشورنس، پنشن، ویلفیئر بورڈ کی تشکیل اور حکومت سے کیے گئے دیگر مطالبات کے نتیجے میں ڈرائیوروں نے بدھ سے ریاست بھر میں غیر معینہ مدت کی ہڑتال شروع کر دی ہے۔