ہماری کوشش ہے پورے ملک میں ایک ہی بار الیکشن ہوں، وزیر داخلہ

فیصل آباد: وفاقی وزیر داخلہ رانا ثنا اللہ نے کہا ہے کہ ہماری کوشش ہے کہ پورے ملک میں ایک ہی بار قومی اور صوبائی اسمبلی کے انتخابات ہوں مگر جو سپریم کورٹ اور الیکشن کمیشن کا فیصلہ ہوگا اُس پر عمل کریں گے۔

عمران خان کے الزامات اور جوڈیشل کمپلیکس میں پیش آنے والے واقعات پر پریس کانفرنس کرتے ہوئے وزیر داخلہ نے کہا کہ عمران خان نے مسلح جتھوں کے ساتھ مل کر جوڈیشل کمپلیکس پر حملہ کیا، اس طرح سے عدالت جانا غنڈہ گردی ہے۔

رانا ثنا اللہ نے کہا کہ اگر یہی روایت برقرار رہی تو آئندہ کوئی بھی شخص مسلح جتھوں کے ساتھ عدالت جاکر دباؤ ڈالے گا اور قانون کو روند دے گا۔ وزیر داخلہ کا کہنا تھا کہ عمران خان کو عدالت کے باہر ہی حاضری لگوانی تھی تو یہ کام کینال روڈ یا ٹول پلازہ بھی ہوسکتا تھا۔ اگر عمران خان کو عدالت کے باہر ہی حاضری لگوانی تھی تو ٹول پلازہ یا کینال روڈ پر ہی یہ کام کرلیتے۔

مزید پڑھیں: عمران خان اقتدار چھن جانے پر دہشت گرد بن چکا، مریم اورنگزیب

انہوں نے کہا کہ عمران خان مسلسل جھوٹ بول کرقوم کوگمراہ کرنےکی کوشش کررہاہے، عمران خان نے سیاست میں گالم گلوچ اوربدتہذیبی کےکلچرکوفروغ دیا اور سیاسی مخالفین پرالزام تراشی کےسواکچھ نہیں کیا۔

وزیرداخلہ کا کہنا تھاکہ مریم نواز نےعمران خان کی فتنہ فساد کی نام نہاد سیاست کو بے نقاب کیا اور وہ آئندہ بھی پی ٹی آئی کے مکروہ چہرے کو بے نقاب کرتی رہیں گی، ہمیں معلوم ہے کہ مریم نواز آپ کو کتنی تکلیف پہنچا رہی ہیں۔

ن لیگی رہنما نے کہا کہ عمران خان کے بیانات اس کےدل میں بغض کا نتیجہ ہیں، اب وہ یہ بھی بتائے کہ خزانےکو جو 50 ارب کا ٹیکا لگایا وہ کہاں ہیں، اپنی فرنٹ پرسن فرح گوگی کا بتائیں کہ وہ کہاں ہیں۔ وزیر داخلہ نے کہا کہ ’اس شخص کولوٹ مار کا حساب دینا ہوگا، آج نہیں تو کل اسے تمام چیزوں اور قومی خزانے کو نقصان پہنچانے کا حساب دینا ہوگا۔

یہ بھی پڑھیں: زمان پارک آپریشن؛ یہ سیاسی کارکنان نہیں تربیت یافتہ دہشت گرد ہیں، مریم نواز

انہوں نے کہا کہ پولیس نے رہائشی حصے کی تلاشی نہیں لی جبکہ وارنٹ تھے، اگر پولیس وہاں جاتی تو بہت زیادہ ممنوعہ اشیا مل سکتی تھیں۔

رانا ثنا اللہ نے کہا کہ ملک میں غیر آئینی انتخابات ہونے جارہے ہیں کیونکہ نگراں سیٹ اپ صوبائی اور قومی اسمبلی کے انتخابات کروانے کا پابند ہے، پنجاب اور خیبرپختونخوا کے انتخابی نتائج کو کوئی تسلیم نہیں کرے گا اور پھر اس سے ملک میں غیر یقینی صورت حال بڑھے گی جو آپ کی خواہش ہے، ہماری خواہش ہے کہ پورے ملک میں ایک ساتھ انتخابات ہوں مگر جب بھی الیکشن ہوئے تو قوم آپ کو ووٹ کی طاقت سے ہی مسترد کرے گی۔