عمران خان کے بھانجے حسان نیازی کیخلاف کراچی میں مقدمہ درج

 کراچی: عمران خان کے بھانجے حسان نیازی کیخلاف کراچی میں مقدمہ درج کرلیا گیا۔

ایکسپریس نیوز کے مطابق چئیرمین پی ٹی آئی عمران خان کے بھانجے حسان نیازی کے خلاف کراچی میں بھی مقدمہ درج کرلیا گیا، مقدمہ الزام نمبر 128/23 تھانہ جمشید کوارٹر میں محمد اقبال نامی شخص کی مدعیت میں درج کیا گیا، مقدمہ حسان نیازی اوردیگرساتھیوں کے خلاف درج کیا گیا۔

یہ بھی پڑھیں: کوئٹہ؛ حسان نیازی راہداری ریمانڈ پر پنجاب پولیس کے حوالے

ایف آئی آر کے متن میں مدعی کی جانب سے کہا گیا ہے کہ حسان نیاز کی جانب سے سوشل میڈیا پر شئیر ویڈیو میں عوام کو بغاوت پر اکسایا گیا، حسان نیازی نے ملکی دفاعی اداروں کو مخاطب کرکے دھمکایا اور کہا کہ عمران خان گرفتار ہوا تو کسی حاجی یا حافظ کا خیال نہیں رکھا جائے گا۔

مدعی کی جانب سے ایف آئی آر میں یہ کہا گیا کہ حسان نیازی نے سوشل میڈیا پر دھمکی دیتے ہوئے کہا کہ دما دم مست قلندر ہوگا اور اس ملک میں خانہ جنگی ہوگی، حسان نیازی کے بیان سے عوام میں غم وغصہ پایا جاتا ہے۔