پٹھان کی شاندار کامیابی؛ شاہ رخ خان نے مہنگی ترین کار خرید لی

 ممبئی: بالی ووڈ کنگ شاہ رخ خان نے پٹھان فلم کی ریکارڈ توڑ کامیابی کی خوشی میں کروڑوں روپے مالیت کی نئی کار خرید لی۔

بھارتی میڈیا کے مطابق شاہ رخ خان نے رولس رائس کی کلینن بلیک بیج ایس یو وی خریدی ہے جس کی قیمت 10 کروڑ روپے سے زیادہ ہے، یہ کار کلینن کا خصوصی ایڈیشن ماڈل ہے۔

انٹرنیٹ پر وائرل ہونیوالی ایک ویڈیو میں شاہ رخ خان کو اپنی نئی سفید رنگ کی چمچماتی ہوئی کار کو ممبئی کی سڑکوں پر چلاتے ہوئے دیکھا گیا ہے جس میں انکی مخصوص 0555 والی نمبر پلیٹ بھی لگی ہوئی تھی۔

#ShahRukhKhan new car Rolls-Royce 555 entrying in #Mannat last night @iamsrk pic.twitter.com/tU1GWgkC9T

— SRK Khammam Fan club (@srkkhammamfc) March 27, 2023

واضح رہے کہ شاہ رخ خان کے پاس پہلے ہی آڈی، بی ایم ڈبلیو، مرسڈیز بینز، لینڈ کروزر جیسی مہنگی ترین گاڑیاں موجود ہیں۔

شاہ رخ خان کی فلم پٹھان نے انڈین باکس آفس سے تقریباً 541.71 کروڑ روپے کمائے ہیں جبکہ اس نے دنیا بھر میں تقریباً 1,049 کروڑ روپے کا بزنس کیا ہے۔

بھارت کی بلاک بسٹر فلم پٹھان 25 جنوری کو سنیما گھروں میں ریلیز کی گئی تھی جبکہ اسے 22 مارچ کو ایمیزون پرائم ویڈیو پر بھی ریلیز کردیا گیا ہے۔

سدھارتھ آنند کی ہدایت کاری میں بننے والی اس فلم میں ہندوستانی جاسوس اور ایک پاکستانی ایجنٹ پر توجہ مرکوز کی گئی ہے، فلم میں شاہ رخ خان، دیپیکا پڈوکون، جان ابراہم، آشوتوش رانا، ڈمپل کپاڈیہ اور منیش وادھوا نے مرکزی کردار ادا کیے ہیں۔