سرراہ نوجوان لڑکی کو ہراساں کرنے والا ملزم گرفتار

وائرل فوٹیج میں دیکھا جا سکتا ہے کہ موٹرسائیکل سوار ملزم لڑکی کا پرس بھی چھیننے کی بھی کوشش کرتا ہے

اسٹاف رپورٹر جمعرات 30 مارچ 2023

—فوٹو: ایکسپریس نیوز

کراچی: کورنگی میں پولیس نے سرراہ نوجوان لڑکی کو ہراساں کرنے والے ملزم کو گرفتار کر کے مقدمہ درج کرلیا۔

کورنگی کے علاقے ڈھائی نمبر میں گلی سے گزرنے والی برقع پوش لڑکی کو ہراساں کرنے والا ملزم قانون کی گرفت میں آگیا، واقعہ کی فوٹیج سوشل میڈیا پر وائرل ہوئی تھی جس میں ملزم کو موٹر سائیکل پر دیکھا جا سکتا ہے اور بعدازاں وہ لڑکی کے قریب سے گزرتے ہوئے اسے ہراساں کرتا ہے۔

فوٹیج میں دیکھا جا سکتا ہے کہ ملزم لڑکی کا پرس بھی چھیننے کی بھی کوشش کرتا ہے لیکن اس میں اسے کامیاب نہیں ہوتا اور ملزم موٹر سائیکل پر فرار ہوجاتا ہے۔

واقعہ کی ویڈیو سوشل میڈیا پر وائرل ہونے کے بعد پولیس بھی حرکت میں آگئی اور خفیہ ذرائع سے ملنے والی اطلاع پر پولیس نے چھاپہ مار کارروائی میں ملزم کو 24 گھنٹوں کے اندر گرفتار کرلیا۔

پولیس کے مطابق گرفتار ملزم کی شناخت جاوید کے نام سے کی گئی جو کہ کورنگی بنگالی کیمپ کا رہائشی ہے، پولیس نے ملزم کے خلاف مقدمہ درج کر کے انویسٹی گیشن پولیس کے حوالے کر دیا۔