جولائی تا مارچ: ٹیکس وصولیاں ہدف سے 304 ارب روپے کم رہنے کا انکشاف

 اسلام آباد: فیڈرل بورڈ آف ریونیو(ایف بی آر) کی جانب سے  رواں مالی سال کے ابتدائی 9 ماہ کے دوران  مجموعی عبوری ٹیکس وصولیاں ہدف سے 304 ارب روپے کم رہنے کا انکشاف ہوا ہے۔

ایف بی آر کے ذرائع نے ’’ ایکسپریس ‘‘ کو بتایا کہ رواں مالی سال23-2022کے پہلے 9 ماہ(جولائی تا مارچ)کے دوران مجموعی طور پر5156 ارب روپے کی ٹیکس وصولیاں کی گئی ہیں۔

اگرچہ یہ رقم مالی سال22-2021کے اسی عرصے میں حاصل کردہ 4375ارب روپے کی ٹیکس وصولیوں کے مقابلے میں780.4 ارب روپےزیادہ ہے  تاہم رواں مالی سال کے پہلے 9ماہ کے لیے مقررکردہ 5460ارب روپے کی ٹیکس وصولیوں کے نظرثانی شدہ  ہدف کے مقابلے میں304 ارب روپے کم ہے۔

ذرائع کا کہنا ہے کہ مارچ  کے مہینے  میں ایف بی آر کی عبوری ٹیکس وصولیاں 663 ارب روپے رہی ہیں، جب کہ آئی ایم ایف کے ساتھ طے شرائط کے تحت نئے ٹیکس لاگو کرنے کے بعد اس مہینے کے لیے نظرثانی شدہ ہدف 720 ارب  روپے مقرر کیا گیا تھا۔ اس طرح مارچ میں ہدف سے 64 ارب روپے کم ٹیکس وصولیاں ہوئی ہیں۔

تاہم اگلے چندروز میں ٹیکس وصولیوں کے حتمی اعدادوشمار موصول ہونے پر ریونیو شارٹ فال میں کچھ کمی متوقع ہے۔