سوات میں بے موسمی برفباری؛ چھت گرنے سے بچی سمیت خاتون جاں بحق

سوات:  مئی کے مہینے میں برف باری اور تیز بارش سے جاتی ہوئی سرد لوٹ آئی، بارش کے سبب چھت گرنے سے بچی اور خاتون جاں  بحق ہوگئے جبکہ موسم انتہائی سرد ہوگیا۔

ایکسپریس نیوز  کے مطابق سوات کے مختلف علاقوں میں تیزبارش، برف باری اور ژالہ باری سے باغات اور فصلیں تباہ ہوگئیں، خوبانی کے پھل پکنے سے قبل ہی گرنے سے لاکھوں کا نقصان ہوا ہے۔

تحصیل چارباغ کے علاقہ سیر تلیگرام کے گاؤں گل آباد میں  تیز بارش کے دوران مکان کی چھت گر گئی جس کے نتیجے میں ایک بچی جاں بحق ہوگئی۔

مٹہ کے علاقہ ڈیران پٹے میں بھی تیز بارش سے مکان کی چھت گرنے سے ملبے تلے دب کر ایک خاتون جاں بحق اور ایک بچی زخمی ہوگئی، مقامی لوگوں نے اپنی مدد آپ کے تحت لاش اور زخمی بچی کو ملبے سے نکالا۔

بارش اور ژالہ باری سے  مینگورہ شہر اور مضافات میں کھڑی فصلیں اور باغت تباہ ہوگئے، خوبانی کے پھل پکنے سے قبل ہی جھڑ گئے جس سے لاکھوں کا نقصان ہوا ہے۔

سوات کے بالائی علاقوں کالام،مدین بحرین اور میاندم میں بھی تیز بارش اور ژالہ باری ہوئی جبکہ  پلوگاہ،مہوڈنڈ،گبرال اور شاہی باغ میں شدید برف باری ہوئی ہے۔

خوازہ خیلہ اور مٹہ میں بھی  ژالہ باری سے کھڑی فصلیں تباہ ہوگئی ہیں اور کئی علاقوں میں  ندی نالوں میں طغیانی آنے سے دکانوں اور گھروں میں پانی داخل ہوگیا ہے۔