وزیر داخلہ کا پی ٹی آئی مظاہرین سے پوری سختی سے نمٹنے کا حکم

 اسلام آباد: وفاقی وزیر داخلہ رانا ثنا اللہ نے کہا ہے کہ عمران خان کی گرفتاری قانون کے مطابق ہوئی، سرکاری و نجی املاک کو نقصان پہنچانے والوں سے آہنی ہاتھوں سے نمٹا جائے گا۔

رانا ثنا اللہ نے اسلام آباد میں پریس کانفرنس کرتے ہوئے کہا کہ عمران کی گرفتاری القادر ٹرسٹ کیس میں کی گئی ہے، یہ ایک پراپرٹی ٹائیکون کی منی لانڈرنگ کی رقم یو کے میں پکڑی گئی تھی، 190 ملین پاؤنڈ (60 ارب روپے) عوام کی ملکیت تھے۔

انہوں نے کہا کہ یہ رقم قومی خزانے میں واپس آنی تھی، برطانیہ نے حکومت پاکستان سے رقم کی واپسی کے لئے رابطہ کیا، شہزاد اکبر کی دلالی میں سودا پایا گیا، دو ارب شہزاد اکبر نے اپنی دلالی کا لیا، سوہاوہ اور بنی گالہ میں پراپرٹی القادر ٹرسٹ کے نام سے رجسٹر ہوئی، ساٹھ ارب کی رقم قومی خزانہ میں لانے کی بجائے سپریم کورٹ میں ایڈجسٹ کروادی گئی، سپریم کورٹ نے بھی نوٹس نہیں لیا کہ جو رقم یوکے سے آرہی ہے کیوں آرہی ہے کس کی ہے۔

وزیر داخلہ کا کہنا تھا کہ عمران خان کے خلاف دستاویزاتی ثبوت ہیں، وہ اس کیس میں پیش نہیں ہوئے اور ہائی کورٹ میں چیلنج کیا، شامل تفتیش ہونے سے انکار کردیا، ان کی گرفتاری وارنٹ پر ہوئی ہے، یہ انتقامی کارروائی نہیں بلکہ ثابت شدہ ڈاکیومنٹڈ کرپشن ہے، حلفیہ کہتا ہوں اس کیس سے متعلق میری نیب سے کوئی بات نہیں ہوئی اور چیئرمین نیب سے کبھی نہیں ملا۔

رانا ثنا نے کہا کہ ہمیں گلہ نہیں کہ اسلام آباد ہائی کورٹ نے نوٹس لیا ہے، ہماری گرفتاریوں کے وقت عدلیہ اتنی فعال نہیں تھی، جب روز شہزاد اکبر جھوٹی پریس کانفرنس کررہا تھا، جب نیب کے چیئرمین کو ایک ویڈیو کے ذریعہ بلیک میل کیا گیا، جب لوگوں کے خلاف منشیات کے جھوٹے مقدمات قائم کئے گئے، اس وقت تو سوموٹو نوٹس نہیں لئے گئے، ہمارے پکارے جانے پر بھی انصاف نہیں مل رہا تھا۔

انہوں نے مزید کہا کہ عمران خان کو اسلام آباد میں ریہیب مرکز میں رکھا جائے جہاں ان کا علاج بھی ہوجائے اور تفتیش بھی ہوجائے۔

وزیر داخلہ نے بتایا کہ تمام صوبوں کے چیف سیکرٹریز اور آئی جیز کو ہدایت کی گئی ہے کہ پی ٹی آئی مظاہرین نے امن و امان میں خلل ڈالا اور سڑکیں بند کیں تو ان کیساتھ پوری سختی اور طاقت سے نمٹا جائے۔

حکومت کا سرکاری و نجی املاک میں توڑ پھوڑ کرنے والوں سے آہنی ہاتھوں سے نمٹنے کا فیصلہ

بعد ازاں ملک بھر میں جاری پرتشدد مظاہروں اور دھرنوں پر حکومت نے سرکاری ونجی املاک میں داخل ہونے یا توڑ پھوڑ کرنے والوں سے آہنی ہاتھوں سے نمٹنے کا فیصلہ کرلیا۔ وفاقی وزیر داخلہ رانا ثنا اللہ نے سرکاری و نجی املاک کو نقصان پہنچانے والوں کو خبردار کرتے ہوئے کہا کہ قانون کسی صورت بھی ہاتھ میں لینے کی اجازت نہیں دی جائے گی،اس حوالے سے زیرو ٹالرنس کی پالیسی ہے۔

انہوں نے کہا کہ قانونی معاملے میں غیرقانونی اور فسادی  طرزِ عمل برداشت نہیں کریں گے ، سرکاری ونجی املاک میں داخل ہونے یا توڑ پھوڑ پر آہنی ہاتھوں سے نمٹیں گے۔

انہوں نے کہا کہ  سکیورٹی فورسز کو ہدایت کی ہے کہ شرپسندوں ، غنڈہ گردوں کو قانون کے مطابق ڈیل کریں، عمران نیازی کی گرفتاری کرپشن کیس میں  ہوئی ہے، اس وجہ سے ریاست پہ حملہ آور ہونے والوں کے ساتھ کوئی رعایت نہیں برتی جائے گی اور سیاسی دہشت گردوں ، غنڈوں کے خلاف سخت سے سخت کاروائی کی جائے گی۔