اسلام آباد اور راولپنڈی میں فوج تعینات، پنجاب اور خیبرپختون خوا میں دستے طلب

 لاہور: وفاقی کابینہ کی منظوری اور وزارت داخلہ کے حکم پر اسلام آباد اور راولپنڈی میں فوج نے ذمہ داریاں سنبھال لیں جبکہ پنجاب اور خیبرپختونخوا میں دستوں کو طلب کرلیا گیا ہے۔

محکمہ داخلہ پنجاب نے فوج کو طلب کرنے کی منظوری دے دی۔ لاہور سمیت صوبے کے اہم اضلاع میں امان وامان کی صورتحال کو کنٹرول کیاجائے گا۔ فوج اس حوالے سے پولیس اور رینجرز کی مدد کرے گی۔

یہ بھی پڑھیں: پی  ٹی آئی رہنما اسد عمر کو بھی گرفتار کرلیا گیا

پنجاب نے وفاق کوسمری بھجوادی جس کے مطابق فوج کی دس کمپنیوں کوطلب کیا جائے گا۔ پنجاب میں امن وامان کی صورتحال بگڑ جانے پر یہ فیصلہ کیاگیا ہے۔

ادھر خیبرپختون خوا حکومت نے بھی کشیدہ حالات کے باعث آرٹیکل 246 کے تحت فوج کو طلب کرلیا ہے ۔ صوبائی حکومت نے تحریری خط لکھ دیا۔ صوبائی محکمہ داخلہ نے وفاقی سیکرٹری داخلہ کو فوج کی تعیناتی کے لیے خط لکھا۔ پاک فوج کی کمپنیاں کشیدہ علاقوں میں تعینات رہیں گی۔

خیبرپختوخواکابینہ نے صوبہ میں امن وامان کے لیے فوج کی خدمات لینے کی منظوری دی اور محکمہ داخلہ کے فیصلے کی توثیق کردی۔ محکمہ داخلہ کی جانب سے آرٹیکل 245 کے تحت صوبہ میں امن وامان برقراررکھنے کے لیے ریکوزیشن کی تھی۔

دریں اثنا راولپنڈی میں فوج تعینات کردی گی، راولپنڈی فوجی دستے اہم شاہراہوں پر گشت کررہے ہیں، راولپنڈی ابتدائی طور پرفوجی دستے کینٹ کے علاقوں میں گشت کررہے ہیں۔

علاوہ ازیں اسلام آباد کے مختلف علاقوں میں بھی امن و امان کنٹرول کرنے کے لیے فوج کے دستوں نے گشت کیا۔