گرانٹ بریڈ برن 2 سال کیلئے قومی ٹیم کے کوچ مقرر

پاکستان کرکٹ بورڈ (پی سی بی) نے گرانٹ بریڈ برن کو 2 سال کیلئے پاکستانی کرکٹ ٹیم کا ہیڈ کوچ مقرر کردیا۔

پی سی بی کی جانب سے جاری اعلامیے میں کہا گیا ہے کہ نیوزی لینڈ کے خلاف حالیہ سیریز میں کنسلٹنٹ کے طور پر ذمہ داریاں نبھانے والے گرانٹ بریڈ برن ہیڈکوچ مقرر کیا گیا ہے۔ انکی کوچنگ میں پاکستان نے 1-4 سے سیریز اپنے نام کی تھی جبکہ ٹی20 سیریز دو دو سے برابر رہی تھی۔

گرانٹ بریڈ برن اس سے قبل 2018 سے 2020 تک پاکستانی ٹیم کے فیلڈنگ کوچ کے علاوہ قومی کرکٹ اکیڈمی میں بھی خدمات سرانجام دے چکے ہیں۔
نیوزی لینڈ سے تعلق رکھنے والے گرانٹ بریڈ برن اسکاٹ لینڈ کے بھی ہیڈکوچ رہ چکے ہیں۔

مزید پڑھیں: ورلڈکپ 2023 کیلئے قومی ٹیم کا ممکنہ اسکواڈ کیا ہوگا؟

اس موقع پر گرانٹ بریڈبرن کا کہنا تھا کہ پاکستان جیسی باصلاحیت اور مہارت کی حامل ٹیم کے ساتھ کام کرنا ان کیلئے اعزاز ہے، ہم اپنی صلاحیتوں میں اضافے کے لیے سخت محنت کررہے ہیں۔ وہ اور مکی آرتھر بہت زیادہ پرجوش ہیں کہ اپنے کھلاڑیوں کی مدد کریں۔

اس موقع پر پاکستان کرکٹ بورڈ کی منیجمنٹ کمیٹی کے چیرمین نجم سیٹھی کا کہنا تھا کہ انہیں بریڈبرن کو ہیڈکوچ مقرر کرتے ہوئے خوشی محسوس ہورہی ہے، وہ انتہائی تجربہ کار کوچ ہیں۔

مزید پڑھیں: ورلڈکپ؛ پاک بھارت میچ کون سے اسٹیڈیم میں ہوگا؟ بھارتی میڈیا نے بتادیا

ورلڈکپ سے قبل پاکستانی ٹیم افغانستان کے خلاف سیریز اور ایشیاکپ کھیلے گی جس میں ٹیم کو اپنی صلاحیت دکھانے کا موقع ملے گا اور میگا ایونٹ کی تیاری میں مدد ملے گی۔