مکڑی کا دس فٹ بلند مجسمہ تین کروڑ 28 لاکھ ڈالر میں فروخت

نیویارک میں 10 فٹ اونچا مکڑی کا مجسمہ پاکستانی رقم میں نو ارب 34 کروڑ روپے میں فروخت ہوا (فوٹو: سی این این)

---

امریکی نژاد فرانسیسی خاتون مجسمہ ساز اور فنکارہ کی جانب سے مکڑی کا ایک دیوقامت مجسمہ تین کروڑ 28 لاکھ ڈالر میں فروخت ہوا ہے۔

پاکستانی رقم میں یہ مالیت 9 ارب 34 کروڑ روپے بنتی ہے، فروخت ہونے والا شاہکار لوئیس جوزفائن بورژوا نے 1996ء میں بنایا تھا۔ خاتون فنکارہ نے مسلسل کئی دہائیوں تک غیر معمولی بڑے اسکلپچر بنائے جو دنیا بھر میں مقبول ہوئے۔ اسپائیڈر نامی یہ مسجمہ دس فٹ بلند ہے اور کانسی سے ڈھالا گیا ہے۔



واضح رہے کہ پیش گوئی کی گئی تھی شاید یہ فن پارہ چار کروڑ ڈالر تک میں فروخت ہوگا لیکن اس سے کچھ کم رقم میں خریدا گیا ہے تاہم نیویارک میں فروخت ہونے والا مجسمہ لوئیس کا سب سے مہنگا فروخت ہونے والا شاہکار بھی ہے، اگرچہ لوئیس نے ایسی کئی مکڑیاں کاڑھی تھیں لیکن ان میں سے چار فروخت یا نیلام ہوئی ہیں۔



لوئیس بورژوا نے 2010ء میں 98 سال کی عمر میں وفات پائی تھی۔ دنیا بھر کی اعلیٰ ترین گیلریوں میں ان کے نوادرات موجود ہیں جن میں پینٹنگ اور مجمسمے بھی شامل ہیں۔