فلم ''تیری میری کہانیاں'' اس عید الاضحیٰ پر سینما گھروں میں ریلیز ہوگی جس کی کاسٹ میں کئی بڑے ستارے شامل ہیں۔
'تیری میری کہانیاں' پاکستانی سینما میں پیش کی جانے والی سب سے بڑی اسٹارکاسٹ پر مبنی فلم ہے جو تین نامور ہدایت کاروں کی جانب سے پیش کی جارہی ہے جن میں نبیل قریشی، ندیم بیگ اور مرینہ خان شامل ہیں، فلم کی کہانی نامور لکھاریوں نے ترتیب دی ہے جن میں خلیل الرحمٰن قمر، واسع چوہدری، علی عباس نقوی اور باسط نقوی شامل ہیں۔
ان میں سے ایک کہانی خلیل الرحمان قمر نے لکھی ہے جبکہ اسے معروف ہدایت کار ندیم بیگ نے ڈائریکٹ کیا ہے جس میں ہمیں وہاج علی اور مہوش حیات کی جوڑی دیکھنے کو ملے گی جب کہ زاہد احمد بھی ان کے ساتھ کاسٹ میں شامل ہو رہے ہیں۔
خلیل الرحمان قمر نے حال ہی میں انکشاف کیا تھا کہ وہاج علی نے ان سے یہ کردار کرنے کو کہا اور وہ یہ جاننے کے لیے اس پروجیکٹ کو دیکھیں گے کہ آیا وہاج نے اچھا کام کیا ہے یا نہیں۔