کچھ لوگوں کی انا اور ضد ملک سے بڑی ہوگئی ہے، چوہدری شجاعت

 لاہور: مسلم لیگ (ق) کے سربراہ چوہدری شجاعت نے کہا ہے کہ کچھ لوگوں کی ضد اور انا ملک سے بڑی ہوگئی ہے۔

ایکسپریس نیوز کے مطابق چوہدری شجاعت کی زیر صدارت مسلم لیگ ق کا اہم اجلاس ہوا، جس میں ملک کی موجودہ سیاسی اور معاشی صورت حال پر غور اور آل پارٹی کانفرنس بلانے کا فیصلہ کیا گیا۔

مسلم لیگ ق کے مطابق تمام سیاسی اور مذہبی جماعتوں کو مدعو کیا جائے گا تاہم پی ٹی آئی کو بلانے پر فیصلہ ابھی نہیں ہوا۔

اجلاس کے شرکا سے گفتگو کرتے ہوئے چوہدری شجاعت نے کہا کہ کچھ لوگوں کی ضد اور انا ملک سے بڑی ہوگئی ہے، پاک فوج محفوظ اور مضبوط پاکستان کی ضمانت ہے، فوج پر تنقید کرنے والے شام، عراق کی حالت دیکھ لیں۔

دوسری جانب چوہدری سرور بھی سیاسی منظر نامے پر متحرک ہوگئے ہیں اور انہوں نے سیاسی شخصیات سے اہم ملاقاتیں کیں۔ ق لیگ کے سینئر رہنما نے سابق وزیراعظم آزاد کشمیر سردار الیاس سے ملاقات کی اور ہاتھ پکڑ کر انہیں لاہور لے آئے جہاں اُن کی چوہدری شجاعت سے ملاقات ہوئی۔

سردار الیاس نے کہا کہ چوہدری شجاعت سے ہمارا احترام کا رشتہ ہے، ہم سیاسی بزرگوں کی قدر کرتے ہیں۔