راولپنڈی دوران ڈکیتی آزاد کشمیر کے جج کو قتل کرنے والا ڈاکو مقابلے میں ہلاک

آزاد کشمیر کے جج سردار امجد اسحاق کی ایک فائل فوٹو

---

راولپنڈی تھانہ روات کے علاقے میں مبینہ پولیس مقابلہ میں ڈاکو مارا گیا، ہلاک ڈاکو نور آغا نے چند روز قبل گھر میں واردات کے دوران آزاد کشمیر کے جج سردار امجد اسحاق کو فائرنگ کرکے قتل کیا تھا۔

اس حوالے سے پولیس ترجمان نے بتایا ہے کہ تھانہ روات کی حدود میں پانچ مسلح ملزمان نے پولیس پر فائرنگ کی تھی، جوابی فائرنگ میں ایک ملزم ہلاک ہوا جس کی لاش کو پوسٹ مارٹم کے لیے ڈسٹرکٹ ہیڈ کوارٹرز ہسپتال منتقل کیا۔



ترجمان کے مطابق ڈاکو کی شناخت نور آغا کے نام سے ہوئی جس نے آزاد کشمیر کے جج سردار امجد اسحاق کو واردات میں فائرنگ کرکے قتل کردیا تھا، ملزم کا ایک زخمی ساتھی 10 روز قبل ہسپتال میں دوران علاج دم توڑ چکا ہے، لاش کی شناخت مقتول جج کے بیٹے نے بھی کرلی ہے، دیگر ملزمان کی گرفتاری کے لیے چھاپے مارے جارہے ہیں۔