ناسا نے اپنی اسٹریمنگ سروس متعارف کروانے کا اعلان کر دیا

 نیویارک: امریکی خلائی ادارے ناسا نے اپنی اسٹریمنگ سروس متعارف کروانے کا اعلان کر دیا ہے۔

غیر ملکی خبر رساں ادارے کے مطابق نیشنل ایروناٹیکل اسپیس ایڈمنسٹریشن (ناسا) اپنی اسٹریمنگ سروس رواں سال متعارف کروائے گا جس کو ناسا پلس کا نام دیا گیا ہے۔

اس اسٹریمنگ سروس کی خاص بات یہ ہے کہ اس کے صارفین کو ماہانہ فیس کی ادائیگی نہیں کرنی ہوگی۔ نیٹ فلکس جیسی مشہور اسٹریمنگ سروس سے مدِمقابل آنے والی ناسا پلس پر خلائی لانچز کو براہ راست دکھایا جائے گا۔

یہی نہیں بلکہ اس اسٹریمنگ سروس کے صارفین کو  اوریجنل ویڈیو سیریز کلیکشنز تک بھی رسائی فراہم کی جائے گی جبکہ ناسا پلس پر کسی قسم کا اشتہار بھی نہیں پیش کیا جائے گا تاکہ صارفین کو اسٹریمنگ میں رکاوٹ کا سامنا نہ کرنا پڑے۔

غیر ملکی خبر رساں ادارے کے مطابق ناسا کے ایسوسی ایٹ ایڈمنسٹریٹر آف کمیونیکیشن، مارک ایٹکائنڈ نے ایک بیان میں کہا کہ ’ہم اپنے صارفین کی مانگ پر ناسا کے نئے اسٹریمنگ پلیٹ فارم کو جلد پیش کرنے جارہے ہیں۔‘

ان کا کہنا تھا کہ اس اسٹریمنگ پلیٹ فارم کے زریعے ہمیں ناسا کی دریافت اور کہانیوں کو لوگوں تک بہتر انداز میں پہنچانے میں مدد ملے گی۔

یاد رہے کہ ناسا کی اسٹریمنگ سروس ناسا ایپ کے زریعے آئی او ایس، اینڈرائیڈ موبائل اور ٹیبلٹ سمیت ویب براؤزر پر بھی دستیاب ہوگی۔