توشہ خانہ کیس؛ ہائیکورٹ کے فیصلے کیخلاف چیئرمین پی ٹی آئی کا سپریم کورٹ سے رجوع

 اسلام آباد: توشہ خانہ کیس میں اسلام آباد ہائیکورٹ کے فیصلے کے خلاف چیئرمین تحریک انصاف نے ایک بار پھر سپریم کورٹ سے رجوع کرتے ہوئے ٹرائل رکوانے کے لیے اپیل دائر کر دی۔

فوری سماعت کے لیے چیئرمین پی ٹی آئی نے متفرق درخواست بھی دے دی۔

چیئرمین پی ٹی آئی کی جانب سے دائر اپیل میں موقف اختیار کیا گیا ہے کہ اسلام آباد ہائیکورٹ نے ٹرائل کورٹ کو کارروائی سے نہیں روکا، حکم امتناع نہ دینے سے ٹرائل کورٹ میں سماعت مکمل ہو جائے گی اور ٹرائل مکمل ہونے کے بعد ہائیکورٹ میں اپیلیں غیر موثر ہو جائیں گی، ہائیکورٹ کو حکم امتناع پر منظور یا مسترد کا آرڈر کرنا چاہیے تھا۔ اسلام آباد ہائیکورٹ کے حکم کے خلاف اپیل سماعت کے لیے منظور کی جائے۔

متفرق درخواست میں کیس یکم اگست کو سماعت کے لیے مقرر کرنے کی استدعا کی گئی ہے۔

اس سے قبل چیئرمین پی ٹی آئی کی لیگل ٹیم چیف جسٹس پاکستان کی کمرہ عدالت جا پہنچی اور استدعا کی کہ توشہ خانہ کیس انتہائی اہم معاملہ ہے، ہم نے سپریم کورٹ میں اپیل دائر کرنی ہے۔ چیف جسٹس پاکستان نے کہا کہ پہلے اپیل دائر کریں پھر دیکھ لیں گے، آپ ماشاءاللہ سمجھدار وکیل ہیں ہر چیز کا ایک طریقہ ہوتا ہے۔

بعدازاں، سپریم کورٹ نے توشہ خانہ کیس میں اسلام آباد ہائیکورٹ کے فیصلے کے خلاف اپیل پر نمبر لگا دیا۔