لفٹ میں 3 دن تک پھنسے رہنے کے بعد خاتون ہلاک

تاشقند: ازبکستان کی کثیرالمنزلہ عمارت کی لفٹ سے ایک 32 سالہ خاتون کی لاش برآمد ہوئی ہے جو تین دن سے لاپتا تھیں۔

عالمی خبر رساں ادارے کے مطابق لفٹ سے ملنے والی لاش خاتون لیونٹیفا کی ہے جو اسی عمارت میں رہتی تھیں اور نویں منزل پر لفٹ میں پھنس گئی تھیں۔ خاتون نے مدد کے لیے پکارا لیکن آواز نیچے تک نہ پہنچ سکی۔

تین روز قبل جب لیونٹیفا دفتر سے گھر نہیں پہنچیں تو اہل خانہ نے گمشدگی کی رپورٹ درج کرائی تھی اور پولیس خاتون کو تلاش بھی کر رہی تھی۔ خاتون کی لاش تعفن اُٹھنے کے نتیجے میں برآمد ہوئی۔

پولیس نے لاش کو پوسٹ مارٹم کے لیے بھیج کر تحقیقات کا آغاز کردیا۔